ءبىر قولىندا نارەستە، ءبىر قولىندا رۋل: استاناداعى تاكسي جۇرگىزۋشى ايەل انىقتالدى
بۇل تۋرالى الەۋمەتتىك جەلىدە تاكسي جولاۋشىلارىنىڭ ءبىرى جازدى، دەپ حابارلايدى قازاقپارات.
«تاكسي شاقىردىم. رۋلدە ورامال تاققان جاس كەلىنشەك. جولاۋشىلارعا ارنالعان الدىڭعى ورىندا جورگەكتەگى بالا جاتتى»، - دەپ جازادى جولاۋشى.
5 مينۋتتان كەيىن بالا جىلاي باستاعان. ايەل ءسابيدى قولىنا الىپ، قوزعالىسىن جالعاستىرعان.
«ءۇنسىز وتىرۋعا شىدامىم جەتپەدى، ءجونسىز بولسا دا جۇرگىزۋشى كەلىنشەكتى اڭگىمەگە تارتتىم. بالاسى بەس ايلىق. تاڭعى جەتىدەن تۇسكە دەيىن تاكسيلەتىپ، تۇسكى استان سوڭ قايتا جۇمىسقا شىعادى ەكەن»، - دەيدى جولاۋشى.
الەۋمەتتىك جەلىدە تاراعان ۆيدەوعا استانا پوليتسياسى نازار اۋدارىپ، ايەلدى تاپقان. ونى جاۋاپكەرشىلىككە تارتپاي، ءتۇسىندىرۋ جۇرگىزۋمەن شەكتەلگەن. سونداي-اق سىيلىق تا تارتۋ ەتكەن.
«الەۋمەتتىك جەلىلەردى باقىلاۋ بارىسىندا ايەل ادامنىڭ كولىك جۇرگىزىپ كەلە جاتىپ، جىلاپ جاتقان نارەستەنى قولىنا الىپ، قوزعالىسىن جالعاستىرعان ۆيدەوجازبا انىقتالدى.
اۆتولەدي ءبىر قولىمەن بالانى ۇستاپ، ەكىنشىسىمەن كولىكتى باسقارعان. اراسىندا بالاسىنا قاراي ەڭكەيىپ، جولدان نازارى اۋعان ساتتەر بولعان.
ەلوردا پوليتسەيلەرى جۇرگىزۋشىنى انىقتادى. ونىمەن بالالاردى تاسىمالداۋ تالاپتارىن بۇزۋ تۋرالى پروفيلاكتيكالىق اڭگىمە جۇرگىزىلدى.
سونداي-اق استانا قالالىق پوليتسيا دەپارتامەنتى مامانداندىرىلعان باتالونىنىڭ قىزمەتكەرلەرى ايەلگە بالانى تاماقتاندىرۋعا ارنالعان ارنايى ورىندىق سىيلادى»، - دەلىنگەن پوليتسيا حابارلاماسىندا.
