وسكەمەندە قازاقتان شىققان تۇڭعىش اسكەري ۇشقىش جاقىپبەك مالدىبايەۆقا ستەللا ورناتىلدى

جاقىپبەك مالدىبايەۆ 1907 -جىلى 15- مامىردا شىعىس قازاقستان وبلىسى كۇرشىم اۋدانىنىڭ شەڭگەلدى اۋىلىندا تۋعان. 1929 -جىلى ءوز ەركىمەن قىزىل ارميا قاتارىنا قوسىلىپ، مەرۆ قالاسىنداعى تۇركىستان اتتى اسكەر بريگاداسىنىڭ 82-دەربەس پولكىندا قىزمەت ەتتى. 1937 -جىلى جۋكوۆسكي اتىنداعى اسكەري اۋە اكادەمياسىنىڭ شتۋرماندىق ءبولىمىن سىرتتاي وقىپ بىتىرگەن جاقىپبەك زۆەنونىڭ فلاگشتۋرمانى قىزمەتىنە تاعايىندالادى.

سوۆەتتىك 160 ەرىكتى ۇشقىشتار قاتارىندا اعا لەيتەنانت جاقىپبەك مالدىبايەۆ يسپانيانىڭ ازاتتىق سوعىسىنا قاتىسادى. سودان ەلگە قايتىپ كەلە جاتقاندا، تاشكەنت ماڭىندا 1938 -جىلعى 30 -ناۋرىزدا اۆياتسيالىق اپاتتان وپات بولعان. قازاقتان شىققان تۇڭعىش اسكەري ۇشقىش تاشكەنت قالاسىنداعى اسكەري اەرودرومنىڭ بىرىندەگى ۇشقىشتار زيراتىنا جەرلەنگەن.

9- قاراشا كۇنى وسكەمەندەگى جاقىپبەك مالدىبايەۆ كوشەسىندە اسكەري ۇشقىشقا ستەللا ورناتىلدى. سالتاناتتى اشىلۋ راسىمىنە قالا اكىمىنىڭ ورىنباسارى يرينا سميت، ۇشقىشتىڭ نەمەرە ءىنىسى بولاتبەك مالدىبيەۆ، نەمەرە قارىنداسى كۇلاش ومار قىزى قاتىستى. شارا بارىسىندا تۇڭعىش ۇشقىشتىڭ ءومىرىن زەرتتەپ، ارحيۆتەردەن اقتارىپ، قۇندى تاريحي ماقالا جازعان جۋرناليست- جازۋشى ايتمۇحامبەت قاسىموۆ ءسوز الدى.

«بۇل ستەللا بىلتىر بوي كوتەرگەن «ماڭگىلىك ەل» مونۋمەنتى، جۋىقتا ورناتىلعان حالىق قاھارمانى ساعادات نۇرماعامبەتوۆتىڭ ەسكەرتكىشى سياقتى وسكەمەننىڭ كوركى مەن كەلبەتىنە قوسىلىپ وتىرعان ساۋلەت ونەرىنىڭ تاماشا ءبىر تۋىندىسى عانا ەمەس، كەيىنگى ۇرپاقتىڭ بابالار مەن اعالار ەرلىگىنە دەگەن قۇرمەتى مەن پارىزى، ۇلتتىق رۋحىمىزدى كوتەرىپ، جالىنداتا تۇسەتىن كيەلى دە قاسيەتتى ەسكەرتكىش دەپ ايتۋعا ابدەن بولادى. وسى ۇلكەن ىسكە مۇرىندىق بولعان قالا اكىمدىگىنە، ەسكەرتكىشتىڭ اۆتورى نۇربول قالييەۆقا شىن جۇرەكتەن العىسىمدى بىلدىرەمىن!»، - دەدى ول.

اۆتور

تالعاتجان مۇحامەتبەك ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى