كورەرمەندەردى جىلاتقان «قىزجىلاعان» قويىلىمى: ماڭگىلىك بالا بەينەدەگى ەڭلىك جۇرتپەن جۇزدەستى
«قاناتتىلار» ينكليۋزيۆتى تەاترى ساحنالاعان «قىزجىلاعان» قويىلىمى ەرەكشە رەجيسسەرلىق شەشىمىمەن كورەرمەندەردىڭ ىستىق ىقىلاسىنا بولەنىپ، كوزدەرىنە جاس ءۇيىردى.
«قىزجىلاعان» - سەمەي يادرولىق پوليگونىنان مۇگەدەك بولىپ، وسپەي قالعان قىز ءومىرى جايىندا. ساحنالىق قويىلىم - يادرولىق سىناق پوليگونىنىڭ سالدارى، ادام مەن تابيعات ءوزارا ۇيلەسىمدىلىگى جانە ادامگەرشىلىكتىڭ قاي داۋىردە دە ادام جانىنىڭ جاۋھارى ەكەنى جايلى باياندايدى.
ءبىر ايتا كەتەرلىگى، قويىلىمنىڭ تۇساۋكەسەرىنە ماڭگىلىك بالا بەينەنىڭ ءپروتوتيپى ەڭلىك ءوزى كەلىپ قاتىستى.
«پوليگون كەسىرىنەن جارىمجان بولىپ قالعان جانداردىڭ سۋرەتتەرى قويىلعان فوتوكورمەدەن العاش رەت ەڭلىكتىڭ سۋرەتىن كوردىم. بالا بەينەدە وسپەي قالعان ءجاسوسپىرىم پەرىشتە قىزدىڭ سۋرەتى ماعان ۇلكەن اڭگىمە جازدىردى. ول سپەكتاكلگە اينالدى، ول كينوفيلمگە اينالدى، ول قۋىرشاق تەاترىندا وينالدى. ەگەر تاۋەلسىزدىك بولماعاندا بۇنداي جابىق تاقىرىپتاردى مەن جازا الماعان بولار ەدىم. تاۋەلسىزدىكتىڭ ارقاسىندا اشىق جازىپ، جۇرتقا جەتكىزە الدىق. تاۋەلسىزدىگىمىز ماڭگى، عۇمىرلى بولسىن. مەن ءوزىم ەڭلىكتى بۇگىن ءبىرىنشى رەت ومىردە كورىپ تۇرمىن، اينالايىن عۇمىر جاسىڭ ۇزاق بولسىن، پەرىشە قىز!» - دەدى روزا مۇقانوۆا.
قويىلىمدى تاماشالاعان اقپارات جانە قوعامدىق دامۋ ءمينيسترى دارحان قىدىرالى شىعارماشىلىق توپقا شىنايى العىسىن جەتكىزدى.
«تەبىرەنىسكە تولى كەرەمەت قويىلىمدى كوردىك. ءبىز قاسىرەتىمىزدى قاسيەتىمىزبەن جەڭگەن حالىقپىز. وسىنداي كەرەمەت شىعارما ءۇشىن روزا اپايعا العىس ايتامىن. وسى تۋىندىنى ورىنداعان «قاناتتىلار» ينكليۋزيۆتى تەاترىنىڭ ونەرپازدارىنا ريزاشىلىعىمدى بىلدىرەمىن. ءبىز سىزدەرمەن ماقتانامىز، سىزدەردىڭ شىن مانىندە قاناتتارىڭىز بار. وسىنداي تازالىقتارىڭىزبەن، شىنايى ونەرلەرىڭىزبەن قالىقتاي بەرىڭىزدەر»، - دەدى مينيستر.
ايتا كەتەيىك، قويىلىمنىڭ رەجيسسەرى - ماكسيم ابزالبەك، «قاناتتىلار» ينكليۋزيۆتى تەاترىنىڭ جەتەكشىسى - ارنۇر ىسقاقوۆ.
اۆتور
ريزابەك نۇسىپبەك ۇلى
