قازاندا تەڭگەنىڭ نىعايۋىنا قانداي فاكتورلار اسەر ەتتى

بۇل تۋرالى ۇلتتىق بانك ءتوراعاسىنىڭ ورىنباسارى ءاليا مولدابەكوۆا مالىمدەدى، دەپ حابارلايدى قازاقپارات.

«قازاندا ءبىز ۆاليۋتا نارىعىندا قالىپتى قۇبىلمالىلىقتى بايقادىق. ءبىر ايدىڭ ىشىندە ديناميكا ءارتۇرلى باعىتتا ءوربىدى. قازاننىڭ قورىتىندىسى بويىنشا، تەڭگە %1,7 نىعايدى. مۇناي باعاسىنىڭ ءوسۋى دە تەڭگەنىڭ نىعايۋىنا تۇرتكى بولدى. بازالىق مولشەرلەمەنى كوتەرۋ جانە كۆازيمەملەكەتتىك سەكتور سۋبەكتىلەرىنىڭ ساتۋى دا تەڭگەگە قولداۋ كورسەتتى.

قازاندا ۇلتتىق قوردان ۆاليۋتانى ساتۋ 362 ميلليون ا ق ش دوللارى كولەمىندە بولدى، بۇل رەتتە ءبىر ساۋدا كۇنى ىشىندە ساتۋ كولەمى 30 ميلليون ا ق ش دوللارىنان اسقان جوق. ءبىز ۇلتتىق قوردان ۆاليۋتانى ساتۋ تەك رەسپۋبليكالىق بيۋدجەتكە ترانسفەرتتى قامتاماسىز ەتۋ قاجەت بولعان جاعدايدا عانا جۇزەگە اسىرىلاتىنىن بىرنەشە رەت اتاپ وتتىك. ءبىزدىڭ تاراپىمىزدان وسى وپەراتسيالاردىڭ ۆاليۋتا نارىعىنداعى اعىمداعى سەنتيمەنتكە اسەرىن بارىنشا ازايتۋ ءۇشىن بارلىق كۇش-جىگەر جۇمسالىپ وتىر. ۆاليۋتانى ساتۋ بويىنشا مامىلەلەردى ىسكە اسىرۋ كەزىندە ۇلتتىق بانك price-taker رەتىندە ارەكەت ەتەدى، ياعني ءوز وتىنىمدەرىن قويماي، قولدا بار وتىنىمدەر بويىنشا «جۇمىس جۇرگىزەدى». نارىققا قاتىسۋشىلاردىڭ باعاسىمەن كەلىسە وتىرىپ، ءبىز وپەراتسيالاردىڭ نارىقتىق باعامعا اسەرىن جوققا شىعارامىز.

قازىر ۆاليۋتا نارىعى تەڭگەرىمدى. ۆاليۋتالىق ينتەرۆەنتسيالار جۇرگىزۋ قاجەت بولمادى»، - دەيدى ءاليا مولدابەكوۆا.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى