الماتى پوليتسياسى اۆتوبۋستاردىڭ سوقتىعىسۋىنا قاتىستى تولىق مالىمەت بەردى

«جول-كولىك وقيعاسىنىڭ سحەماسىنا جانە ۆيدەوباقىلاۋ جۇيەلەرىنە جاسالعان تالداۋعا سايكەس، كەشە ساعات 14.05 تە جەكە تاسىمالداۋشىلاردىڭ بىرىنە تيەسىلى ماز قوعامدىق كولىگىنىڭ 35 جاستاعى جۇرگىزۋشىسى ابىلاي حان داڭعىلىمەن وڭتۇستىك باعىتتا كەلە جاتىپ، تولە بي داڭعىلىنىڭ قيىلىسىندا باعدارشامنىڭ تىيىم سالىنعان بەلگىسىنە ءوتىپ كەتكەن. سولاي، تولە بي داڭعىلىمەن شىعىس باعىتتا كەلە جاتقان Golden Dragon ماركالى اۆتوبۋسپەن سوقتىعىسقان. كولىكتى 59 جاستاعى ەر ادام باسقارعان.

سوقتىعىسۋدان سوڭ 98-باعىتتاعى قوعامدىق كولىك ەكپىنمەن تروتۋارعا شىعىپ كەتىپ، جاياۋ جۇرگىنشىلەردى قاعىپ كەتتى.

سالدارىنان جاياۋ جۇرگىنشىلەردىڭ ءبىرى - 37 جاستاعى ەر ادام وقيعا ورنىندا كوز جۇمدى»، - دەلىنگەن پوليتسيا مالىمەتىندە.

اتالعان دەرەك ق ر قىلمىستىق كودەكسىنىڭ 345-بابى 3-بولىگىنە سايكەس تىركەلدى. ءتيىستى ساراپتامالار تاعايىندالدى.

ەسكە سالايىق، بۇگىن الماتىدا تولە بي - ابىلاي حان كوشەلەرىنىڭ قيىلىسىندا ەكى اۆتوبۋس سوقتىعىستى.

العاشىندا پوليتسەيلەر 1 ادامنىڭ كوز جۇمىپ، 15 ادامنىڭ زارداپ شەككەنى تۋرالى مالىمدەگەن بولاتىن. كەيىن جاراقات العاندار سانى 17 گە ارتتى. سوڭعى مالىمەت بويىنشا، مەديتسينالىق كومەككە 21 ادام جۇگىنگەن، ونىڭ 9 ى اۋرۋحاناعا جاتقىزىلدى.

سونداي-اق بۇگىن الماتىدا اۆتوبۋس پەن جەڭىل كولىك سوقتىعىستى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى