تۇركى مەملەكەتتەرى اراسىندا جەڭىلدەتىلگەن كەدەن ءدالىزى جۇيەسى قۇرىلادى

بۇل تۋرالى ەل ۇكىمەتى ازىرلەگەن كەلىسىم جوباسىندا كورسەتىلگەن، دەپ حابارلايدى قازاقپارات ءتىلشىسى.

قۇجاتتا كورسەتىلگەندەي، اتالعان جۇيە قازاقستان، ازەربايجان، قىرعىزستان، تۇركيا جانە وزبەكستان مەملەكەتتەرىمەن اراداعى ساۋدادا كەدەندىك تارتىپتەردى جەڭىلدەتپەك.

«جەڭىلدەتىلگەن كەدەن ءدالىزى» - اتالعان ەلدەر اراسىنداعى تاۋار اينالىمىندا الدىن الا اقپارات الماسۋعا جانە كولىكتىڭ بارلىق تۇرلەرىندە پايدالانىلۋى مۇمكىن ەلەكتروندىق جۇيە. وسى كەلىسىم كۇشىنە ەنگەننەن كەيىن تاراپتار 6 اي ىشىندە پيلوتتىق جوبانى ۇيىمداستىرادى جانە جۇزەگە اسىرادى. پيلوتتىق جوبانىڭ العاشقى 3 ايىندا تاراپتاردىڭ كەدەن ورگاندارى اقپارات الماسۋدىڭ نەگىزگى تەحنيكالىق شارتتارىن، بەرىلەتىن دەرەكتەردىڭ تىزبەسى مەن قۇرىلىمىن جانە اقپاراتتىق قاۋىپسىزدىككە قويىلاتىن تالاپتاردى ورىنداۋى ءتيىس. ال كەلەسى 3 اي ىشىندە تاراپتار «وڭايلاتىلعان كەدەن ءدالىزىن» پراكتيكالىق نەگىزدە ىسكە اسىرادى»، - دەلىنگەن قۇجاتتا.

كەلىسىم اياسىندا اتالعان ەلدەردىڭ ساۋدا وپەراتورلارىنا دا باسىمدىق بەرىلەدى. اتاپ ايتقاندا، كەدەندىك رەسىمدەۋ ۋاقىتى قىسقارادى، وڭايلاتىلعان كەدەندىك جۇيە قۇرىلادى.

سونىمەن قاتار، كەدەن زاڭناماسىن بۇزۋ فاكتىلەرى تىركەلمەگەن بولسا، وندا تاۋاردى ءجىتى تەكسەرۋ جۇرگىزىلمەيدى.

قۇجاتتا جازىلعانداي، ەگەر ءجىتى كەدەندىك تەكسەرۋ قاجەت بولسا، ول قىسقا مەرزىمدە جۇرگىزىلۋى ءتيىس.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى