پرەزيدەنت اتىراۋدا مادەنيەت ورتالىعىن سالىپ، وعان قۇرمانعازىنىڭ اتىن بەرۋدى ۇسىندى

مىسالى، 10 جىل بۇرىن سالىنا باستاعان كونسەرت زالى ءالى پايدالانۋعا بەرىلگەن جوق، دەپ حابارلايدى قازاقپارات.

«وبلىستاعى مادەنيەت سالاسىن دامىتۋعا ەرەكشە نازار اۋدارۋ قاجەت. قالادا مادەنيەت ورىندارىنىڭ كوبىرەك بولعانى ءجون. مەن اتىراۋ قالاسىندا دارىندى جاستار ءۇشىن مادەنيەت جانە شىعارماشىلىق ورتالىعىن سالۋدى تاپسىرامىن. ونى قازاق كۇي ونەرىنىڭ الىبى - قۇرمانعازىنىڭ اتىمەن اتاۋدى ۇسىنامىن. وبلىس ورتالىعىندا وتباسىلىق دەمالىس ورىندارى جانە جاستاردىڭ بوس ۋاقىتىن پايدالى وتكىزەتىن ورتالىقتار كوپ ەمەس. جايىق جاعالاۋى اباتتاندىرىلدى،«جاستار ساياباعى» سالىندى. بۇل ورىن جەرگىلىكتى جۇرت ءجيى باراتىن دەمالىس ورىندارىنىڭ بىرىنە اينالدى. اكىمدىك وسىنداي جاڭا جوبالاردى قولعا الۋى قاجەت. قالاداعى بارلىق نىساندار مۇمكىندىگى شەكتەۋلى ازاماتتارعا ىڭعايلى بولۋى كەرەك. ءبىزدىڭ قوعام ءۇشىن ەڭ ماڭىزدى تالاپتىڭ ءبىرى - وسى. اتىراۋ ءاربىر تۇرعىنعا قولايلى، تازا، زاماناۋي قالاعا اينالۋعا ءتيىس. قالادا كەيبىر نىسانداردىڭ قۇرىلىسى كوپ جىلدان بەرى توقتاپ تۇر. مىسالى، 10 جىل بۇرىن سالىنا باستاعان كونسەرت زالى ءالى پايدالانۋعا بەرىلگەن جوق. ءتىپتى، ونىڭ عيماراتى جارامسىز كۇيگە ءتۇستى. ۇكىمەت اكىمدىكپەن بىرلەسىپ، وسىنداي نىسانداردى سالىپ ءبىتىرۋ ماسەلەسىن ءبىرجولا شەشۋگە ءتيىس. قاجەت بولسا، ينۆەستورلاردى تارتىڭىزدار. حالىق مۇنداي عيماراتتاردىڭ يگىلىگىن كورۋى قاجەت»، - دەدى جيىندا قازاقستان پرەزيدەنتى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى