قازاقستاندا ەلەكتروندى تەمەكى مەن ەنەرگەتيكالىق سۋسىن جاستارعا ساتىلماۋى مۇمكىن
«بۇل ۇرپاقتىڭ دەنساۋلىعىن ساقتاۋ ءۇشىن وتە ماڭىزدى. جاستاردىڭ جات قىلىققا بوي الدىرۋىنا جول بەرمەۋىمىز كەرەك.
قازىر ەرەسەكتەردىڭ ەرمەگىنە اينالعان ەلەكتروندى تەمەكىگە وقۋشىلار دا اۋەستەنىپ بارادى. مۇنداي تەمەكىنى بالالار دۇكەننەن ەش كەدەرگىسىز ساتىپ الادى. بۇل - قاۋىپتى جاعداي»، - دەدى قاسىم- جومارت توقايەۆ.
ول بىزدە الكوگول ونىمدەرىن 21 جاسقا تولماعان ازاماتتارعا ساتۋعا تىيىم سالىنعانىن ەسكە سالدى. ءبىراق، بۇل تالاپ ءىس جۇزىندە ورىندالا بەرمەيدى. قۇزىرلى ورگاندار باقىلاۋدى كۇشەيتۋى كەرەك.
«قوعامدا ەنەرگەتيكالىق سۋسىنداردى جاستارعا ساتۋعا تىيىم سالۋ قاجەتتىگى ءجيى ايتىلادى. ۇكىمەت بۇل ماسەلەنى مۇقيات زەردەلەپ، ناقتى شەشىم قابىلداۋى كەرەك.
مۇحتار اۋەزوۆتىڭ«ەل بولامىن دەسەڭ، بەسىگىڭدى تۇزە» دەگەن ءسوزى بار. ءبىز ۇرپاقتىڭ دەنساۋلىعىن جانە تاربيەسىن بۇگىن ويلاماساق، ەرتەڭ كەش بولۋى مۇمكىن»، - دەدى مەملەكەت باسشىسى.
قازاقستاننىڭ ىرگەلى جوعارى وقۋ ورىندارىندا ءبىلىم الۋ ءۇشىن اتىراۋ وبلىسىنا بولىنگەن 4 مىڭ گرانتتىڭ 800-گە جۋىعى عانا يگەرىلگەن.
«ءبىلىم بەرۋ جانە مادەنيەت سالاسىن دامىتۋ قاجەت. وبلىستا اپاتتى جاعدايدا تۇرعان جانە ءۇش اۋىسىممەن وقىتاتىن مەكتەپتەر ماسەلەسى ءالى شەشىمىن تاپپاي وتىر. بالاباقشالار دا جەتىسپەيدى. قازىر 17 مىڭعا جۋىق بالا كەزەكتە تۇر. بۇل ماسەلەنى شەشۋگە قاجەتتى قارجى قاراستىرىلعان. سونىمەن قاتار، كەلەسى جىلى«جايلى مەكتەپ» ۇلتتىق جوباسىمەن 11 مەكتەپ سالىنادى. بۇعان رەسپۋبليكالىق بيۋدجەتتەن قارجى بولىنەدى. ءبىلىم بەرۋ ينفراقۇرىلىمىن جاڭعىرتۋعا قاتىستى جوسپاردى تولىق ورىنداۋ كەرەك. ۇكىمەت جانە اكىمدىك ونىڭ ۋاقتىلى جانە ساپالى جۇزەگە اسىرىلۋىن قاتاڭ باقىلاۋعا ءتيىس. اتىراۋ وبلىسىندا كاسىپتىك جانە تەحنيكالىق ءبىلىم بەرەتىن 24 مەكەمە بار. وندا 16 مىڭ ستۋدەنت ءبىلىم الىپ جاتىر. ءبىراق، وسى كوللەدجدەردىڭ تۇلەكتەرى كوبىنە جۇمىس تابا الماي قينالادى. بۇل ماسەلە ءار وبلىستا بار. وقۋ- اعارتۋ مينيسترلىگىنە وبلىس اكىمدەرىمەن بىرلەسىپ، كاسىپتىك- تەحنيكالىق وقۋ ورىندارىن ەڭبەك نارىعىنا بەيىمدەۋ ءۇشىن ناقتى شارا قابىلداۋدى تاپسىرامىن»، - دەدى قاسىم- جومارت توقايەۆ.
مەملەكەت باسشىسىنىڭ ايتۋىنشا، قازاقستاننىڭ ىرگەلى جوعارى وقۋ ورىندارىندا ءبىلىم الۋ ءۇشىن باتىس ايماعىنداعى جاستارىنا 10 مىڭ گرانت ءبولىندى، ءبىراق ول ءتيىستى دەڭگەيدە يگەرىلمەي وتىر.
«جوعارى ءبىلىمنىڭ قولجەتىمدى بولۋى، ءبىلىم ساپاسىن ارتتىرۋ، جاراتىلىستانۋ جانە تەحنيكالىق باعىتتاعى ۋنيۆەرسيتەتتەردى كۇشەيتۋ اسا ماڭىزدى. مەن قىركۇيەكتەگى ءوز جولداۋىمدا وسىعان قاتىستى ءبىرقاتار مىندەت جۇكتەدىم. مەنىڭ باستاماممەن اتىراۋدا رەسەيدىڭ گۋبكين اتىنداعى مۇناي- گاز ۋنيۆەرسيتەتىنىڭ فيليالى اشىلدى. اتالعان ۋنيۆەرسيتەتتىڭ تۇلەكتەرىنە ەڭبەك نارىعىندا سۇرانىس كوپ بولادى دەپ سەنەمىن.
مەنىڭ تاپسىرماممەن قازاقستاننىڭ ىرگەلى جوعارى وقۋ ورىندارىندا ءبىلىم الۋ ءۇشىن باتىس ايماعىنداعى جاستارىنا 10 مىڭ گرانت ءبولىندى. ءبىراق، وسى گرانتتارمەن وقۋعا تۇسكەن بالا كوپ ەمەس. مەن بۇل تۋرالى كەشە اقتاۋدا دا ايتتىم. اتىراۋ وبلىسىنا بولىنگەن 4 مىڭ گرانتتىڭ 800-گە جۋىعى عانا يگەرىلگەن. بۇل - وتە تومەن كورسەتكىش. اكىمدىك قۇزىرلى مينيسترلىكتەرمەن بىرلەسىپ، وسى ماسەلە بويىنشا اقپاراتتىق ءتۇسىندىرۋ جۇمىستارىن جۇرگىزۋى قاجەت»، دەپ اتاپ ءوتتى مەملەكەت باسشىسى.
