ەرتە زاماندا پاۆلوداردا كەرىكتەر مەن ءۇش تۇياقتى جىلقىلار ءومىر سۇرگەن

گ. پوتانين اتىنداعى پاۆلودار وبلىستىق تاريحي- ولكەتانۋ مۋزەيىنىڭ قورىندا «قازقوناق» ورنىنان تابىلعان جادىگەرلەر ساقتاۋلى. مۋزەيدىڭ ەكسكۋرسيا ءبولىمىنىڭ جەتەكشىسى نادەجدا مايبا اتالعان ورىننان تابىلعان ەرەكشە ەكسپوناتتار تۋرالى ايتىپ بەردى.

«1928 -جىلى پالەونتولوگ يۋريي ورلوۆ قالامىزداعى ەرتىستىڭ وڭ جاعالاۋىندا ەجەلگى زامانعى، وسىدان 5-7 ميلليون جىل بۇرىن ءومىر سۇرگەن جانۋارلاردىڭ سۇيەگىن انىقتاعان. ول جەردە كوپتەگەن قازبا جۇمىستارى جۇرگىزىلدى. بارلىعى ەكى ۆاگون جانۋارلاردىڭ سۇيەگى تابىلعان»، - دەدى نادەجدا مايبا.

سولاردىڭ ىشىندە ەرەكشە جادىگەرلەردىڭ ءبىرى - ءۇش تۇياقتى جىلقى گيپپاريوننىڭ سۇيەگى. قازىرگى جىلقىلاردان ايىرماشىلىعى - بويى الاسا، ءۇش تۇياعىمەن ەرەكشەلەنەدى.

«ول شاپقان كەزدە الدىڭعى ۇلكەن تۇياعىنا كۇش سالادى، ال اقىرىن جۇرگەندە ۇشەۋىنە دە سۇيەنەدى. ءتىسىنىڭ ورنالاسۋى دا ەرەكشە بولعان. ول جۇمساق ءشوپتى جۇلىپ جەي بىلگەن. سوندىقتان بۇل جەردە جۇمساق وسىمدىكتەر بولدى دەپ ايتۋعا بولادى. ولار ءۇيىر بولىپ، كوپ مولشەردە ءومىر سۇرگەن. سولتۇستىك امەريكادان ەۋروپاعا قونىستانىپ، كەيىن وسىندا كەلگەن»، - دەدى نادەجدا مايبا.

سونداي- اق «قازقوناقتا» ەجەلگى كەرىكتىڭ دە سۇيەگى تابىلعان. بۇگىندە مۋزەيدە كەرىكتىڭ جاق سۇيەگىنىڭ بولىگى مەن الدىڭعى اياعىنىڭ سۇيەگى ساقتالعان.

«بۇل كەرىكتىڭ جابايى ءتۇرى - پالەوتراگۋستىڭ سۇيەگى. ولار افريكادان كەلگەن. بۇگىندە وسىنداي كەرىكتەر افريكادا بار. ولار «وكاپ» دەپ اتالادى. دەنەسى كىشكەنتاي بولىپ كەلەدى»، - دەدى نادەجدا مايبا.

مۋزەي قىزمەتكەرىنىڭ ايتۋىنشا، سۇيەكتەردىڭ اتالعان جانۋارلارعا تيەسىلى ەكەنى زەرتحانادا زەرتتەلىپ، دالەلدەنگەن.

«اتالعان ورىننان تابىلعان ەكى ۆاگون سۇيەكتى سول كەزدە ماسكەۋگە جىبەرگەن. سوندا زەرتحانادا ساراپتامالار جاسالعان. زەرتتەۋمەن يۋريي ورلوۆ ءوزى اينالىسىپ، كەيىن كىتاپ قىلىپ شىعارعان»، - دەدى نادەجدا مايبا.

سونىمەن قاتار، «قازقوناقتا» بوكەن، بۇعى، ءمۇيىزتۇمسىق جانە تاعى باسقا بارلىعى 60-قا جۋىق جانۋاردىڭ ءتۇرى ءومىر سۇرگەن.

نادەجدا مايبانىڭ ايتۋىنشا، «قازقوناق» - الەمدە تابيعاتتاعى ۇزدىك 20 ەسكەرتكىشتىڭ قاتارىنا جاتادى. مۇنداي ءبىزدىڭ قالامىزدا جانە گرەكيانىڭ افينا قالاسىندا بار.

فوتو: pavlodarnews.kz

اسحات رايقۇل

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى