ەل كينوتەاترلارىندا «جامبىل. جاڭا ءداۋىر» تاريحي فيلمى ءتۇسىرىلىپ جاتىر

مادەنيەت جانە سپورت مينيسترلىگىنىڭ باسپا ءسوز قىزمەتىنەن ءمالىم ەتكەندەي، ۆەدومستۆو باسشىسى داۋرەن ابايەۆ الماتىعا جۇمىس ساپارى بارىسىندا مەملەكەتتىك قولداۋعا يە بولعان بىرنەشە كينوجوبانىڭ ءتۇسىرىلىم جۇمىستارىمەن تانىسىپ، رەجيسسەرلەرمەن كەزدەستى.

سونداي- اق مينيسترگە 2023 -جىلدىڭ باسىندا كينوتەاترلاردان كورسەتىلەتىن «جامبىل. جاڭا ءداۋىر» تاريحي فيلمىنىڭ ترەيلەرى كورسەتىلدى.

كارتينانىڭ نەگىزگى سيۋجەتى اقىن ءومىرىنىڭ سوڭعى توعىز جىلىنا نەگىزدەلگەن. فيلمنىڭ اكتەرلىك قۇرامىندا دوسجان جانبوتايەۆ، ەرىك جولجاقسىنوۆ، اسان ءماجيت، اننا ستارچەنكو، نۇركەن وتەۋلوۆ، ەرجان نۇرىمبەت، دوسحان جولجاقسىنوۆ، فارحاد ماحمۋدوۆ جانە باسقالارى بار.

داۋرەن ابايەۆ «حوش ءيىستى جۇرەك» كوركەم فيلمىنىڭ ءتۇسىرىلىم الاڭىنا دا باردى. رەجيسسەر ماكسيم كوداروۆتىڭ دەبيۋتتىك تولىقمەتراجدى ەڭبەگى ابيۋزەر ازاماتتىڭ ءومىرى تۋرالى الەۋمەتتىك تاقىرىپتى قامتيدى.

ودان بولەك، مينيستر رەجيسسەر ديلشات راحماتۋلليننىڭ «اشينا. كوكبورىلەر تۋرالى اڭىز» فيلمنىڭ كەيىپكەرلەرىن انييماتسيالاۋ جانە مونتاج جۇمىستارىمەن تانىستى.

ال الماتى وبلىسىندا بەلگىلى رەجيسسەر ءادىلحان ەرجانوۆتىڭ «ءمۇيىزتۇمسىق» فيلمىنىڭ ءتۇسىرىلىمى ءجۇرىپ جاتىر. باستى رولدەردە بەرىك ايتجانوۆ پەن اننا ستارچەنكو وينايدى. ءادىلحان ەرجانوۆتىڭ فيلمدەرى كانن، ۆەنەتسيا، لوكارنو، روتتەردام، بريۋگگە، ستوكگولم، پۋسان سياقتى «ا» كلاسىنداعى حالىقارالىق كينوفەستيۆالدەردە تانىستىرىلىپ ءجۇر. ونىڭ ازيالىق «وسكار» دەپ اتالاتىن بەدەلدى Asia Pacific Screen Awards - 2019 سىيلىعىن جەڭىپ العان قازاقستاندىق تۇڭعىش رەجيسسەر ەكەنىن اتاپ وتكەن ءجون.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى