قازاقستان مەن رەسەي «بايتەرەك» عارىش كەشەنىن ۇشىرۋدى ءبىر جىلعا شەگەردى
بۇل تۋرالى اشىق ن ق ا سايتىندا جاريالانعان ۇكىمەت قاۋلىسىندا كورسەتىلگەن، دەپ حابارلايدى قازاقپارات ءتىلشىسى.
ەكى ەل اراسىنداعى كەلىسىمگە سايكەس «بايقوڭىر» عارىش ايلاعىنان «بايتەرەك» كەشەنىن ۇشىرۋ سىناقتارى 2023-جىلى باستالۋى ءتيىس بولاتىن. ەندى ول ءبىر جىلعا كەيىنگە قالدىرىلدى.
«قازاقستان رەسپۋبليكاسىنىڭ ۇكىمەتى مەن رەسەي فەدەراتسياسىنىڭ ۇكىمەتى ورتا كلاستى زىمىران-تاسىعىشى بار «بايتەرەك» عارىش زىمىران كەشەنىن ۇشىرۋ سىناقتارىن باستاۋدى 2024-جىلى قامتاماسىز ەتەدى»، - دەلىنگەن اشىق تالقىعا شىعارىلعان ۇكىمەت قاۋلىسىنىڭ جوباسىندا.
مۇنداي شەشىم الەمدەگى گەوساياسي جاعدايعا بايلانىستى قابىلدانعان.
«حاتتاماعا قول قويۋ الەمدەگى گەوساياسي جاعدايعا بايلانىستى ورتا كلاستى زىمىران-تاسىعىشى بار «بايتەرەك» عارىشتىق زىمىران كەشەنىنىڭ ۇشىرىلىم سىناقتارىن باستاۋدى 2023-جىلدان 2024-جىلعا شەگەرۋگە مۇمكىندىك بەرەدى»، - دەلىنگەن ق ر سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات مۋسين قول قويعان قۇجاتتا.
