رەسەي ازاماتتارىنىڭ قازاقستانعا كەلىپ- كەتۋى قالىپتى دەڭگەيگە ورالدى
بۇل تۋرالى ق ر پرەمەر- ءمينيسترى ءاليحان سمايىلوۆتىڭ ءماجىلىس دەپۋتاتتارىنىڭ ساۋالىنا بەرگەن جاۋابىندا ايتىلعان، دەپ حابارلايدى قازاقپارات ءتىلشىسى.
«قازاقستان رەسپۋبليكاسىنا رەسەي ازاماتتارىنىڭ كوشى- قونى تۋرالى ساۋالدارىڭىزدى قاراپ، مىنانى حابارلايمىز. قالىپتاسقان جاعدايدى رەتتەۋ ماقساتىندا ۇكىمەت كوشى- قون ماسەلەلەرى بويىنشا ءتورت كەڭەس وتكىزدى، ونىڭ ىشىندە ەكەۋى - مەنىڭ توراعالىعىممەن. كەڭەس قورىتىندىسى بويىنشا بارلىق قاجەتتى شەشىمدەر قابىلدانىپ، ۋاكىلەتتى مەملەكەتتىك ورگاندار مەن وڭىرلەردىڭ اكىمدىكتەرىنە ناقتى تاپسىرمالار بەرىلدى»، - دەپ اتاپ وتەدى ۇكىمەت باسشىسى جاۋابىندا.
ۇكىمەت قابىلداعان ءىس- شارالاردىڭ ناتيجەسىندە:
رەسەي فەدەراتسياسىمەن شەكارادا قازاقستان ازاماتتارى ءۇشىن تۇراقتى «جاسىل ءدالىز» اشىلدى؛
وتكىزۋ پۋنكتەرىندە شەتەل ازاماتتارىنىڭ قۇقىقتارى مەن جاۋاپكەرشىلىگى، كوشى- قون قىزمەتىنە حابارلاۋ، حالىققا قىزمەت كورسەتۋ ورتالىقتارىنىڭ، «1414» بايلانىس ورتالىعى جۇمىسىنىڭ ءتارتىبى كورسەتىلگەن ارنايى اقپاراتتىق ستەندتەر ۇيىمداستىرىلدى؛
وڭىرلەردە تىركەلمەگەن ميگرانتتاردى انىقتاۋ ءۇشىن ءموبيلدى مونيتورينگتىك توپتار قۇرىلدى؛
جاعدايدى تۇراقسىزداندىرۋ جانە جالعان اقپارات تاراتۋ ارەكەتتەرى، اسىرەسە الەۋمەتتىك جەلىلەردە باقىلانىپ، توقتاتىلىپ وتىر؛
ەلگە كەلۋشىلەر ءۇشىن ۋاقىتشا تۇرۋ ورىندارى ۇيىمداستىرىلدى، ولاردىڭ تىركەلۋى، ورنالاسۋى جانە تۇرۋى ءۇشىن قاجەتتى جاعداي جاسالدى؛
جالدامالى تۇرعىن ءۇي، قوناق ۇيلەر مەن جاتاقحانالاردا تۇرۋ باعاسىن باقىلاۋ قامتاماسىز ەتىلدى، كەلۋشىلەر ءۇشىن دە، قازاقستان رەسپۋبليكاسىنىڭ ازاماتتارى ءۇشىن دە جالعا بەرىلەتىن تۇرعىن ءۇي ماسەلەسى بويىنشا «جەدەل جەلى» تەلەفونى اشىلدى؛
قوعامدىق ءتارتىپتى قورعاۋ كۇشەيتىلدى جانە بولۋى مۇمكىن، ونىڭ ىشىندە تۇرمىستىق جانە ۇلتارالىق قاقتىعىستاردىڭ جانە تاعى باسقالارىنىڭ جولى كەسىلدى.
«سونداي- اق پرەمەر- ءمينيستردىڭ ءبىرىنشى ورىنباسارى ر. سكلياردىڭ توراعالىعىمەن حالىقتىڭ كوشى- قونى سالاسىنداعى ماسەلەلەردى ۇيلەستىرۋ جونىندەگى شتاب قۇرىلدى. ۇلتتىق نارىقتى قورعاۋ، مەملەكەتتىك شەكارادا جانە شەكارا ماڭى وڭىرلەرىندە باقىلاۋدى كۇشەيتۋ، كوشى- قون زاڭناماسىن ساقتاۋ جونىندەگى شارالاردى، سونداي- اق كەلۋشىلەردى ۋاقىتشا قونىستاندىرۋعا جانە بەيىمدەۋگە جاردەمدەسۋگە باعىتتالعان ءىس- شارالاردى كوزدەيتىن كوشى- قوننىڭ وسۋىنە بايلانىستى تاۋەكەلدەردى باسقارۋ جونىندەگى ءىس- قيمىل جوسپارى ازىرلەندى. وسى جىلعى قازان ايىندا الدىڭعى ايمەن سالىستىرعاندا رەسەيلىكتەر 65 پايىزعا از كەلگەن جانە كۇن سايىنعى تەرىس سالدو ورتاشا ەسەپپەن 1,6 مىڭ ادامدى قۇراپ وتىر. كۇن سايىن كەلەتىن ر ف ازاماتتارىنىڭ سانى مەملەكەتتىك شەكارادان ءوتۋدىڭ ورتاشا ادەتتەگى دەڭگەيىنە ورالدى»، - دەدى ءاليحان سمايىلوۆ.
