ماڭعىستاۋ جاستارى الماتى مەن استاناعا دا بارۋى قاجەت - پرەزيدەنت
بۇل تۋرالى ق ر پرەزيدەنتى قاسىم- جومارت توقايەۆ ماڭعىستاۋ وبلىسى جۇرتشىلىعىمەن كەزدەسۋىندە ءمالىم ەتتى.
«ءوڭىر جاستارى ەلىمىزدى وركەندەتۋ ءۇشىن تىڭ باستامالار ۇسىنىپ، ونى جۇزەگە اسىرۋعا دايىن. وسى رەتتە، وبلىستاعى جاستار رەسۋرستىق ورتالىقتارىنا زور جاۋاپكەرشىلىك جۇكتەلەدى. دارىندى جانە بەلسەندى جاستاردىڭ ءوز الەۋەتىن جۇزەگە اسىرۋىنا جاعداي جاساۋىمىز كەرەك. بۇدان بولەك، ءوڭىر جاستارى ءوزىنىڭ بىلىكتىلىگىن ارتتىرۋعا نەمەسە جۇمىسقا ورنالاسۋ ءۇشىن باسقا ايماقتارعا، الماتى مەن استاناعا دا بارۋى قاجەت. تەك ءبىر جەردە، ءبىر وڭىردە عانا تۇيىقتالىپ قالۋعا بولمايدى. ۇكىمەت وسى ماسەلەلەر بويىنشا وبلىسقا قولداۋ كورسەتۋگە ءتيىس»، - دەدى ق ر پرەزيدەنتى.
باتىس وبلىستاردىڭ تۇلەكتەرى ءۇشىن قوسىمشا 10 مىڭ گرانت بولىنگەن. ونىڭ ىشىندە ماڭعىستاۋلىقتارعا ارنالعان 6 مىڭ گرانتتىڭ تورتتەن ءبىرى عانا يگەرىلگەن. بۇل ماسەلە قاسىم- جومارت توقايەۆتىڭ ماڭعىستاۋ جۇرتشىلىعىمەن كەزدەسۋىندە كوتەرىلدى.
«وڭىرلەردەگى مەكتەپتەردى دامىتۋ كەرەك. سوندىقتان، وقۋ اعارتۋ مينيسترلىگى اكىمدىكتەرمەن بىرلەسىپ، ايماقتارداعى مەكتەپتەردىڭ قىزمەتىنە تالداۋ جۇرگىزۋى كەرەك. سونداي- اق، مەكتەپتى دامىتۋ باعدارلاماسىن ازىرلەۋگە قاجەتتى ادىستەمە دايىنداۋعا ءتيىس. جاقىندا ءبىلىم بەرۋدى دامىتۋدىڭ 2022-2026 -جىلدارعا ارنالعان تۇجىرىمداماسى بەكىتىلەدى. ونى ىسكە اسىرۋ ءۇشىن قۇزىرلى ورگاندار ءتيىستى شارالاردى ۋاقىتىلى قابىلداۋى كەرەك. وڭىرگە قاجەتتى كاسىبي كادرلاردى دايارلاۋ ىسىنە باسا نازار اۋدارعان ءجون. مەملەكەت جىل سايىن ءبىلىم گرانتىنىڭ سانىن كوبەيتىپ جاتىر. بيىل جوعارى وقۋ ورىندارىنا 73 مىڭ گرانت بەرىلدى. بۇعان قوسا مەن باتىس وبلىستارىنىڭ تۇلەكتەرى ءۇشىن قوسىمشا 10 مىڭ گرانت ءبولۋدى تاپسىردىم. سونىڭ 6 مىڭى ماڭعىستاۋعا بەرىلدى. ءبىراق بۇل گرانتتىڭ تورتتەن ءبىرى عانا يگەرىلگەن. بۇل - تۇسىنىكسىز جاعداي»، - دەدى جيىندا مەملەكەت باسشىسى.
ونىڭ ايتۋىنشا، وبلىستا بىلىكتى ماماندارعا دەگەن سۇرانىس وتە جوعارى.
«اشىعىن ايتساق، جوعارى وقۋ ورىندارى جانە قۇزىرلى مينيسترلىك كاسىبي باعدار بەرۋ جۇمىستارىن ويداعىداي اتقارماي وتىر. تۇلەكتەرگە جانە اتا- انالارعا قوسىمشا گرانت بولىنگەنى تۋرالى تولىق اقپارات جەتپەي جاتادى. عىلىم جانە جوعارى ءبىلىم مينيسترلىگىنە ارنايى ءبىلىم گرانتتارى تۋرالى اقپاراتتىق- ءتۇسىندىرۋ جۇمىستارىن ءتيىستى دەڭگەيدە جۇرگىزۋدى تاپسىرامىن. ايماقتا جاستاردىڭ گرانتپەن ءبىلىم الۋى، مامان تاپشىلىعى، تۇپتەپ كەلگەندە وبلىستىڭ دامۋى - ءبارى ءوزارا تىعىز بايلانىستى ماسەلە. سوندىقتان، وبلىس اكىمى بۇل ماسەلەنى مۇقيات قاراستىرۋى كەرەك، - دەپ اتاپ ءوتتى پرەزيدەنت.
