ءال-فارابي اتىنداعى قازاق ۇلتتىق ۋنيۆەرسيتەتىندە شەرحان مۇرتازا اتىنداعى اۋديتوريا اشىلدى
اۋديتوريانى اشقان اقىن نۇرلان ورازالين جازۋشىنىڭ ادەبي جانە جۋرناليستيكا سالاسىنداعى زور ۇلەسى مەن جەتىستىكتەرىن اتاپ ءوتتى.
«شەرحان مۇرتازا - XXI عاسىردىڭ جارقىن تۇلعالارىنىڭ ءبىرى. ول بار عۇمىرىن ۇلتتىق مادەنيەت پەن ادەبيەتتى دامىتۋعا ارناپ، بولاشاق ۇرپاققا باي رۋحاني مۇرا قالدىردى. ءوزىنىڭ ادالدىعى مەن ادىلدىگى ءۇشىن شەر-اعا ەسىمىمەن تاريحتا قالدى. بۇگىن مەن شەرحان مۇرتازا اتىنداعى اۋديتوريانىڭ اشىلعانىنا وتە قۋانىشتىمىن، ونىڭ ۇلەسى مەن ەڭبەگىن ءبىز ەشقاشان ۇمىتپايمىز. ول قازاقستان جۋرناليستەرىنىڭ بىرنەشە بۋىنىن تاربيەلەدى. جاڭا اۋديتوريادا ءبىزدىڭ بولاشاق جۋرناليستەرىمىزدى شابىتتاندىراتىن ەرەكشە شىعارماشىلىق اتموسفەرا بار. ستۋدەنتتەرگە جانە ۋنيۆەرسيتەت ۇجىمىنا ۇلكەن تابىس پەن وركەندەۋ تىلەيمىن»، - دەدى نۇرلان ورازالين.
ءوز كەزەگىندە پارلامەنت ءماجىلىسىنىڭ دەپۋتاتى دارحان مىڭباي قۇتتىقتاۋ ءسوز سويلەپ، جاڭا اۋديتورياعا قولدان توقىلعان ەرەكشە كىلەمدى سىيعا تارتتى.
سونداي-اق ۋنيۆەرسيتەت قابىرعاسىندا شەرحان مۇرتازانىڭ تۋعانىنا 90 جىل تولۋىنا ارنالعان «جاڭا قازاقستان جانە شەرحان مۇرتازا شىعارماشىلىعىنداعى ادىلەتتى قوعام يدەياسى» اتتى حالىقارالىق عىلىمي-تاجىريبەلىك كونفەرەنتسيا ءوتتى.
كونفەرەنسيا اياسىندا شەرحان مۇرتازانىڭ شىعارماشىلىعى تۋرالى فيلم كورسەتىلىپ، ق ر سەناتىنىڭ ءتوراعاسى ماۋلەن اشىمبايەۆ، الماتى قالاسىنىڭ اكىمى ەربولات دوسايەۆتىڭ قۇتتىقتاۋلارى جانە ونلاين فورماتتا شەتەلدىك عالىمداردىڭ دا ارنايى قۇتتىقتاۋلارى وقىلدى.
ايتا كەتەيىك، قازاق جۋرناليستيكاسىنىڭ مەترى، كلاسسيك جازۋشى شەرحان مۇرتازا «لەنينشىل جاس» گازەتىنىڭ (قازىرگى «جاس الاش») تىلشىسىنەن «قازاقستان» مەملەكەتتىك تەلەراديوكومپانياسىنىڭ ءتوراعاسىنا دەيىنگى ۇلكەن كاسىبي جولدان ءوتتى. ءار جىلدارى «سوتسياليستىك قازاقستان» گازەتىندە ادەبي قىزمەتكەر، «جازۋشى» باسپاسىنىڭ، «جالىن» الماناحىنىڭ، «جۇلدىز» جۋرنالىنىڭ باس رەداكتورى، قازاقستان جازۋشىلار وداعى باسقارماسىنىڭ ەكىنشى حاتشىسى، «قازاق ادەبيەتى»، «ەگەمەن قازاقستان» باسىلىمدارىن باسقارىپ، قر پارلامەنتى ءماجىلىسىنىڭ دەپۋتاتى بولدى.
شەرحان مۇرتازا - «تابىلعان تەڭىز»، «بەلگىسىز سولداتتىڭ بالاسى»، «احمەتجاننىڭ انتى»، «مىلتىقسىز مايدان» پوۆەستەرى، «41-جىلعى كەلىنشەك»، «ينتەرنات نانى» اڭگىمەلەرى، «قارا مارجان»، بەس كىتاپتان تۇراتىن «قىزىل جەبە»، «اي مەن ايشا» جانە باسقا دا شىعارمالاردىڭ اۆتورى.
