پاريجدە فەستيۆال اياسىندا قازاقستان كينوسىنىڭ كۇندەرى ءوتتى

27-30-قازان ارالىعىندا پاريج كورەرمەندەرىنە ءبىرقاتار قازاقستاندىق كارتينالار كورسەتىلدى.

ولاردىڭ قاتارىندا «پاراليمپياداشى»، «ۇلى دالا تاڭى»، «سوڭعى سەانس»، «وت»، «زويانىڭ ورالۋى»، «قىزعالداق» جانە بىرلەسىپ شىعارىلعان «تارلان» مەن «ينفينيتي» فيلمدەرى بار.

«بيىل قازاقستان كينوسىنىڭ كۇندەرى 15 ەلدە وتەدى. فرانسياداعى قازاقستان رەسپۋبليكاسىنىڭ ەلشىلىگى كينو كۇندەرىن وتكىزۋگە ۇلكەن كومەك كورسەتتى. شارانى ق ر مادەنيەت جانە سپورت مينيسترلىگىنىڭ قولداۋىمەن ۇلتتىق كينونى قولداۋ مەملەكەتتىك ورتالىعى ۇيىمداستىردى، - دەيدى ۇ ك ق م و باسقارما ءتوراعاسىنىڭ ورىنباسارى باۋىرجان شوكەنوۆ.

- مۇنداي شارالاردى وتكىزۋدەگى ماقسات - وتاندىق فيلمدەردى تەك فەستيۆالدە عانا ەمەس، سونىمەن قاتار كينوتەاترلاردا دا كورسەتۋ. شەتەلدىك كورەرمەننىڭ قازاقستاندىق كينوعا كينوتەاتردان كورۋگە بولاتىن پروكاتتىق فيلم رەتىندە قىزىعۋشىلىق تانىتۋى ماڭىزدى. ال بۇل ءونىمدى ەكسپورتتاۋدى بىلدىرەدى. بۇل جەردە ءبىز تەك تابىس تۋرالى عانا ەمەس، يدەولوگيا، ءبىزدىڭ ءومىر سالتىمىز تۋرالى ايتىپ وتىرمىز. بۇل - ءوز كەزەگىندە كەز كەلگەن كينەماتوگرافتىڭ ماقساتى. سوندىقتان، ۇ ك ق م و دەلەگاتسياسىنىڭ ىسكەرلىك باعدارلاماسى ءبىرقاتار كەزدەسۋلەردى قامتىدى، ونىڭ ىشىندەگى ەڭ ماڭىزدىسى فرانسيانىڭ ۇلتتىق كينەماتوگرافيا جانە انيماتسيا ورتالىعىنىڭ (CNC) كەڭسەسىندە ءوتتى. حالىقارالىق كوپرودۋكتسيا جونىندەگى كەڭەسشى جيۋلەن ەزانومەن وتكىزگەن كەلىسسوز ەكى ەلدىڭ فيلمدەرىن بىرلەسىپ شىعارۋ، ىلگەرىلەتۋ، سونداي- اق ۇ ك ق م و جانە CNC ساراپشىلارى اراسىندا تاجىريبە الماسۋ ماسەلەلەرىنە ارنالدى».

تاعى ءبىر نازار اۋدارارلىق ءىس- شارا - ەكى ەل كينەماتوگرافيستەرىنىڭ كوپرودۋكتسيالىق جوبالارىنىڭ پيتچينگى.

جەڭىمپازداردى حالىقارالىق قازىلار القاسى انىقتادى.

ونىڭ قۇرامىندا بەلگىلى جانە اتاقتى رەجيسسەرلەر سەرگەي دۆورتسيەۆوي، نينو كيرتادزە، دارەجان ومىربايەۆ جانە راحماتۋ كيتا، سونداي- اق LOCO Films كومپانياسىنىڭ باسشىسى لوران دانەلۋ، فيپرەسسي مۇشەسى باربارا لورەي دە لاشارەر، فرانسيا ەلشىلىگىنىڭ اۋديوۆيزۋالدى ىنتىماقتاستىق جونىندەگى ايماقتىق اتتاشەسى ەممانۋەل فوسيلون، پروكاتتاۋ كومپانياسىنىڭ باسشىسى پاسكال راموندا جانە پروديۋسەر گيوم دە سەي بولدى.

ساراپشىلار قاراۋىنا جەتى كوركەم جانە ەكى دەرەكتى تاسپا ۇسىنىلدى.

بەدەلدى قازىلار القاسىنىڭ شەشىمىنە سايكەس، اسحات كۋچينچەرەكوۆتىڭ «باۋىرىنا سالۋ» كارتيناسى پروديۋسەرلەر قاۋىمداستىعىنان جانە فرانتسياداعى قازاقستان كينوسى فەستيۆالىنىڭ پرەزيدەنتى اندرە يۆانوۆتان پوست- پروداكشەندى اياقتاۋعا جانە ىلگەرىلەتۋگە كومەك الادى.

دارينا ماناپوۆانىڭ «سارا» جانە كاتەرينا سۋۆوروۆانىڭ «قىزبولسىن» جوبالارىن قازىلار القاسى «ۇ ك ق م و» ك ە ا ق جانە CNC پيتچينگتەرىندە قولداۋ ءۇشىن ۇسىندى.

ال رەجيسسەر الينا مۇستافينا جانە ونىڭ In between جوباسى سىيلىق رەتىندە پاريجگە بيلەت الدى.

- بۇل پيتچينگتىڭ العاش رەت ءوتۋى وتە كەرەمەت، - دەيدى الينا مۇستافينا. - مەملەكەت پەن پروديۋسەرلەردىڭ قازاقستاندىق كينەماتوگرافيانى قولداعانىن قالايمىن، سوندا عانا بىزدە جاقسى فيلمدەر كوپ بولادى.

پاريجدەگى لينكولن كينوتەاترىندا وتكەن فەستيۆالدىڭ جابىلۋىنا كوپ ادام جينالدى.

فرانسياداعى قازاقستان كينوسى قاۋىمداستىعىنىڭ باسشىسى اندرە رافاەل يۆانوۆ مىرزا مەن فرانتسياداعى قازاقستان رەسپۋبليكاسىنىڭ ەلشىسى گۇلسارا ارىستانقۇلوۆا فەستيۆال قاتىسۋشىلارىنا ماراپاتتاردى تابىستادى.

«قازاقستاندىق كينەماتوگرافتىڭ دامۋىنا قوسقان ۇلەسى ءۇشىن» جۇلدەنى رەجيسسەر سەرگەي دۆورتسيەۆوي الدى.

دارەجان ومىربايەۆ «قازاقستان مەن فرانتسيا اراسىنداعى بىرلەسكەن كينووندىرىس سالاسىنداعى ىنتىماقتاستىقتى دامىتۋعا قوسقان ۇلەسى ءۇشىن» سىيلىعىمەن ماراپاتتالدى.

فەستيۆال ەلشىسى اكريسا سامال ەسلياموۆا «قازاق كينوسىن ناسيحاتتاۋعا قوسقان ۇلەسى ءۇشىن» ناگراداسىمەن ماراپاتتالدى، ال رەجيسسەرلەر ايجان قاسىمبەك («وت»)، يۋليا زاحاروۆا («تارلان») جانە الديار بايراكيموۆ («پاراليمپياداشى») ءساتتى دەبيۋتى ءۇشىن جۇلدەگە يە بولدى.

«بۇل ماراپاتتى قازاقستان ەلشىسىنىڭ قولىنان العانىما وتە قۋانىشتىمىن، ويتكەنى كينەماتوگرافيستەر سونشالىقتى جوعارى دارەجەدەگى بولماسا دا، فرانسياداعى قازاقستان مادەنيەتىنىڭ ەلشىلەرى دەپ ويلايمىن. ءبىز قازاقستاندىق مادەنيەتتى فيلمدەر ارقىلى تانىتۋعا تىرىسامىز. مەن مەملەكەتتىڭ بۇل ىسكە قاتىسۋى وتە ماڭىزدى دەپ سانايتىن ادامداردىڭ قاتارىنانمىن. مەملەكەتتىڭ كينوعا، سونىڭ ىشىندە اۆتورلىق كينوعا قاراجات ءبولۋى - ۇلكەن ارتىقشىلىق. الەمدە وسىنداي قولداۋ كورسەتەتىن ەل كوپ ەمەس»، - دەيدى سەرگەي دۆورتسيەۆوي.

جاس رەجيسسەر ايجان قاسىمبەكتىڭ ايتۋىنشا، كارتينانى شىعارۋ وڭاي بولماعان.

«دەگەنمەن وسىنداي فەستيۆالدەرگە قاتىسقان ساتتە ەرەكشە كۇش الامىن»، - دەيدى ول.

«مەن بۇكىل كومانداعا، سونداي- اق ۇلتتىق كينونى قولداۋ مەملەكەتتىك ورتالىعىنا العىسىمدى ايتقىم كەلەدى. بولاشاقتا ءبىزدىڭ كينەماتوگراف دامي ءتۇسىپ، تەك ەلىمىز ءۇشىن عانا ەمەس، بۇكىل الەم ءۇشىن ماڭىزدى تاقىرىپتاردى كوتەرۋدى جالعاستىرامىز دەپ سەنەمىن»، - دەپ اتاپ ءوتتى الديار بايراكيموۆ.

كەشتىڭ جابىلۋىندا فرانسياداعى قازاقستان رەسپۋبليكاسىنىڭ ەلشىسى گۇلسارا ارىستانقۇلوۆا حانىم كورەرمەندەرگە ايتقان سوزىندە بىلاي دەدى:

«بۇل - ءبىزدى بىرىكتىرگەن، قازاقستان مەن فرانسيا اراسىنداعى دوستىق بايلانىستى نىعايتاتىن فەستيۆال. مەن بىلاي اياقتاعىم كەلەدى: Vive le cinéma! قازاقستان مەن فرانسيا دوستىعى جاساسىن».

ايتا كەتۋ كەرەك، بيىل قازاقستان كينوسىنىڭ فەستيۆالى ءوز شەكاراسىن كەڭەيتتى، ول پاريجدە، ستراسبۋرگتە، بريۋسسەلدە، ليۋكسەمبۋرگتە جانە جەنيەۆادا وتكىزىلەدى.

فەستيۆال قازاقستان مەن فرانتسيا اراسىنداعى ديپلوماتيالىق قاتىناستىڭ ورناعانىنا 30 جىل تولۋىنا ورايلاستىرىلعان.

فەستيۆالدى فرانسياداعى قازاقستان كينوسىنىڭ قاۋىمداستىعى ۇيىمداستىردى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى