ايىپپۇل تۋرالى حابارلاما الاياقتىقتىڭ جاڭا ءتۇرى مە – س ق و پوليسەيلەرى ءتۇسىندىردى
س ق و پوليتسيا دەپارتامەنتى باسپا ءسوز قىزمەتىنىڭ مالىمەتىنشە، سوڭعى كۇندەرى پەتروپاۆلدىقتار ينتەرنەت- الاياقتىقتىڭ جاڭا ءتۇرى دەپ ايىپپۇلدىڭ كەلگەنى تۋرالى حابارلامانىڭ سكرينشوتىن WhatsApp مەسسەندجەرى ارقىلى تاراتىپ جاتىر. حابارلامانىڭ باسىندا جىبەرۋشى «Police_Pvl» دەپ كورسەتىلگەن. دەپارتامەنتتىڭ كريمينالدىق پوليسيا قىزمەتكەرلەرى وسى حابارلاماعا قاتىستى تۇسىنىكتەمە بەردى.
«مۇنداي رەسمي مەكەنجاي جوق. سوندىقتان، ساق بولۋ كەرەك. ايىپپۇلدىڭ بولۋى نەمەسە بولماۋى تۋرالى رەسمي ارنالار ارقىلى بىلۋگە بولادى، ياعني قر ەلەكتروندىق ۇكىمەتىنىڭ 1414 ءبىرىڭعاي بايلانىس ورتالىعىنا قوڭىراۋ شالۋ نەمەسە پوليسياعا حابارلاسۋ قاجەت. ەشقاشان كۇماندى كورىنەتىن سىلتەمەلەردى باسىپ كىرمەۋ كەرەك: قۇرىلعىعا قاۋىپتى ۆيرۋس ەنگىزۋ قاۋپى بار، بۇل قاسكويلەرگە ءسىزدىڭ قۇپيا اقپاراتىڭىزعا جانە بانكتىك شوتتارىڭىزعا قول جەتكىزۋگە مۇمكىندىك بەرەدى»، - دەيدى س ق و پ د كريمينالدىق پوليتسيا باسقارماسىنىڭ اسا ماڭىزدى ىستەر جونىندەگى اعا جەدەل ۋاكىلى ۆيتالي پودچەرنين.
بۇل جايتقا بايلانىستى س ق و پوليتسياسىندا ارىز تىركەلمەگەن. الايدا، كريمينالدىق پوليتسيا قىزمەتكەرلەرى 1414 ءبىرىڭعاي بايلانىس ورتالىعىنا قازاقستاندىقتاردىڭ كۇماندى حابارلاما كەلۋىنە بايلانىستى جۇگىنگەنىن راستاپ وتىر.
ءتارتىپ ساقشىلارى مەسسەندجەرلەر جانە الەۋمەتتىك جەلىلەر ارقىلى كەلەتىن ءارتۇرلى «اكسيالارعا»، «ۇتىس ويىندارىنا» جانە باسقا دا «قىزىقتى» ۇسىنىستارعا كۇمانمەن قاراۋعا كەڭەس بەرەدى. ينتەرنەت نەمەسە باسقا جولدارمەن كەلەتىن كەز كەلگەن اقپاراتتى رەسمي رەسۋرستاردان تەكسەرۋ قاجەتتىگىن ەسكە سالادى.
