فۋتبولدان الەم چەمپيوناتىن قايدان كورۋگە بولادى؟
قازاقستاندىق جانكۇيەرلەر چەمپيونات ماتچتەرىن Qazaqstan جانە Qazsport تەلەارنالارىنان تىكەلەي ەفيردە كورە الادى. سونىمەن قاتار، qazaqstan.tv جانە qazsporttv.kz سايتى مەن Qazaqstan.tv موبيلدى قوسىمشاسى ارقىلى ونلاين ترانسلياتسيا جاسالادى.
XXII الەم بىرىنشىلىگى كاتاردىڭ 5 قالاسىندا 8 ستاديوندا وتەدى. ترانسلياتسيالاردان بولەك، ءبىر اي بويى تىكەلەي ەفيردە ارنايى باعدارلامالار سيكلى ۇيىمداستىرىلادى.
20- قاراشادان باستاپ «قازاقستان» تەلە-راديوكورپوراتسياسىنىڭ ءتۇسىرىلىم توبى كاتار ستاديوندارىنان رەپورتاجدار ۇسىنىپ، تىكەلەي قوسىلىمدارعا شىعادى. چەمپيونات كەزىندە كورپوراتسيانىڭ الەۋمەتتىك جەلىدەگى پاراقشالارىندا جانكۇيەرلەر اراسىندا فۋتبول اتريبۋتتارى ويناتىلادى.
« XXII الەم بىرىنشىلىگىنىڭ ويىندارىن قازاقستان اۋماعىندا كورسەتۋ قۇقىعى تەك «قازاقستان» رەسپۋبليكالىق تەلە-راديوكورپوراتسياسىنا تيەسىلى. چەمپيوناتتى وزگە اقپارات كوزدەرىنەن ترانسلياتسيالاۋعا، تاراتۋعا تىيىم سالىنادى. ەل اۋماعىنداعى مەملەكەتتىك جانە جەكەمەنشىك عيماراتتار مەن قوعامدىق ورىندارداعى كورسەتىلىمدەر دە تەك Qazaqstan جانە Qazsport تەلەارنالارىنىڭ ەفيرى ارقىلى جۇزەگە اسۋى ءتيىس. ويىنداردى جۇرگىزەتىن كوممەنتاتورلار مەن ماتچتەر كەستەسى جاقىن ۋاقىتتا جاريالانادى»، - دەلىنگەن حابارلامادا.
