تۇڭعىش پرەزيدەنت تۋرالى زاڭنىڭ كۇشىن جوياتىن قۇجات ماجىلىسكە ءالى تۇسكەن جوق - قانات مۋسين
«تۇڭعىش پرەزيدەنتتىڭ مارتەبەسى تۋرالى زاڭعا كەلەتىن بولساق، كونستيتۋتسيادان ەلباسىنا قاتىستى بارلىق نورمالار الىنىپ تاستالعانى بەلگىلى. ءبىراق ماسەلە مىنادا، تۇڭعىش پرەزيدەنت تۋرالى جانە تۇڭعىش پرەزيدەنتكە سىلتەمە جاسايتىن نورمالار ءسىز ايتىپ وتىرعان زاڭدا عانا ەمەس، باسقا زاڭداردا دا بار. وننان استام سونداي زاڭ بار. سوندىقتان بۇل جۇمىس ءبىراز ۋاقىتتى قاجەت ەتەدى، تالداپ، جالپىلاپ، شەشىم قابىلداۋ قاجەت. ۋاقىت وتە كەلە ول ورىندالادى. جۇمىستى بەيىندى مەملەكەتتىك ورگاندار جۇرگىزىپ جاتىر. زاڭ پارلامەنتكە ءالى بەرىلگەن جوق»، - دەدى قانات مۋسين.
سونداي-اق، ول اتالعان زاڭ جوباسى پارلامەنتكە نەگە تۇسپەگەنىن ءتۇسىندىردى.
«زاڭناماعا وزگەرىستەر ەنگىزىپ، تۇڭعىش پرەزيدەنت تۋرالى زاڭ كۇشىن جويۋى ءۇشىن زاڭنامانى تالداۋ قاجەت، زاڭ جوباسى زاڭ جوبالاۋ جۇمىستارىنىڭ جوسپارىنا ەنۋى كەرەك. جوسپار بويىنشا جۇمىس قازىر جۇرگىزىلىپ جاتىر. ماجىلىستە مۇنداي زاڭ جوباسى ءالى جوق، ول ماجىلىسكە جولدانباعان. كونستيتۋتسياعا وزگەرىستەر ەنگىزىلگەندىكتەن، باسقا زاڭدار، سونىڭ ىشىندە تۇڭعىش پرەزيدەنت تۋرالى زاڭدار دا اتا زاڭعا سايكەستەندىرىلۋى كەرەك»، - دەدى ادىلەت ءمينيسترى.
