سەناتتا «ادام قۇقىقتارى جونىندەگى ۋاكىل تۋرالى» زاڭ قابىلداندى
«زاڭ جوباسىنىڭ ماقساتى - ادام قۇقىقتارىن ىسكە اسىرۋدىڭ كەپىلى رەتىندە ادام قۇقىقتارى جونىندەگى ۋاكىلدىڭ كونستيتۋتسيالىق مارتەبەسىن بەكىتۋ بولىگىندە قازاقستان رەسپۋبليكاسىنىڭ كونستيتۋتسياسىنا ەنگىزىلگەن وزگەرىستەردى ىسكە اسىرۋ. كونستيتۋتسيانىڭ جاڭا 83-1-بابىنىڭ نورمالارىمەن ۋاكىلدىڭ قىزمەتىنىڭ مىندەتتەرى، تاۋەلسىزدىگى مەن وكىلەتتىكتەرىن جۇزەگە اسىرۋ كەزىندە قانداي دا ءبىر وزگە مەملەكەتتىك ورگاندار مەن لاۋازىمدى ادامداردىڭ الدىندا ەسەپ بەرمەۋىنىڭ كەپىلدىكتەرى بەكىتىلدى. بۇدان بىلاي ادام قۇقىقتارى جونىندەگى ۋاكىلدىڭ قۇقىقتىق جاعدايى مەن ونىڭ قىزمەتىن ۇيىمداستىرۋ كونستيتۋتسيالىق زاڭمەن ايقىندالادى»، - دەدى ق ر ادىلەت ءمينيسترى قانات مۋسين.
جالپى، كونستيتۋتسيالىق زاڭ 6 تاراۋدان جانە 23 باپتان تۇرادى. زاڭ جوباسى ۋاكىل قىزمەتىنىڭ ماقساتتارى مەن مىندەتتەرىن، ونىڭ قۇقىقتىق جاعدايى مەن قۇزىرەتىن اشادى. ۋاكىلدىڭ، ونىڭ وبلىستارداعى وكىلدەرىنىڭ جانە ادام قۇقىقتارى جونىندەگى ۇلتتىق ورتالىقتىڭ قىزمەتىن ۇيىمداستىرۋعا بايلانىستى ەرەجەلەر كوزدەلگەن.
«قولدانىستاعى زاڭدا كوزدەلمەگەن نەگىزگى جاڭا ەرەجەلەرگە تولىعىراق توقتالعىم كەلەدى. بىرىنشىدەن، ۋاكىلدىڭ قۇزىرەتىن كۇشەيتۋ ەسكەرىلگەن. كونستيتۋتسيا نورمالارىن ىسكە اسىرۋ ماقساتىندا قۇجاتتا ۋاكىلدىڭ ادامنىڭ كونستيتۋتسيادا بەكىتىلگەن قۇقىقتارى مەن بوستاندىقتارىنا قاتىستى نورماتيۆتىك قۇقىقتىق اكتىلەردىڭ كونستيتۋتسياعا سايكەستىگى ماسەلەسى بويىنشا كونستيتۋتسيالىق سوتقا جۇگىنۋ قۇقىعى كوزدەلگەن. سونداي-اق، باسقا مەملەكەتتەردىڭ شاقىرۋى بويىنشا ادام قۇقىقتارى مەن بوستاندىقتارىنىڭ ساقتالۋىنا بايقاۋشى رەتىندە ارەكەت ەتۋ قۇقىعىن بەرۋ ۇسىنىلادى.
ۋاكىلدىڭ قۇزىرەتىن كۇشەيتۋ ماقساتىندا ونىڭ ارناۋلى الەۋمەتتىك قىزمەتتەر كورسەتەتىن ۇيىمدارعا جانە قىلمىستىق- اتقارۋ جۇيەسى مەكەمەلەرىنە كەدەرگىسىز بارۋ قۇقىعى بەكىتىلەدى»، - دەدى مينيستر.
سونىمەن قاتار، ۋاكىلدىڭ قىزمەتىن ۇيىمداستىرۋدىڭ تيىمدىلىگىن ارتتىرۋ بولىگىندە زاڭدا ادام قۇقىقتارى جونىندەگى ۇلتتىق ورتالىق باسشىسىنىڭ ورىنباسارى لاۋازىمىن ەنگىزۋ، سونداي-اق ۇلتتىق ورتالىقتىڭ قوسىمشا فۋنكسيالارى بەلگىلەنەدى.
