اقشانى قالتاعا باسىپ، تايىپ تۇراتىن «جيھاز جاساۋشىلار» كوبەيدى
پىسىقايلار تاپسىرىس بەرۋشىگە كەلىپ، ولشەم جۇرگىزىپ، ونىڭ جالپى سوماسىنىڭ 70 پروتسەنت اقشاسىن الدىن الا العان سوڭ ۇشتى-كۇيلى جوق بولادى. الاياقتاردىڭ ۋادەسىنە سەنىپ، تورىنا ءتۇسىپ قالعان تۇرعىن كوپ. سونىڭ ءبىرى ازامات راحمەت. ءاۋ باستا شەبەردىڭ ءوزى تاپسىرعان جيھازدىڭ قاڭقاسىن ورناتىپ كەتكەنىمەن، كەيىن ۇشتى-كۇيلى جوق بولدى. سودان بەرى ءبىر جىل ءوتتى.
«كوپ ۋاقىت ءوتتى. تاپسىرىسىمدى العان شەبەر ءبىر جىلدان بەرى ەسىگىمنەن ءالى ءبىر سىعالامادى. قوڭىراۋعا مۇلدە جاۋاپ بەرمەيدى. كرەديت الىپ، ءبىر جارىم ميلليون اقشانى شوتىنا اۋدارىپ جىبەردىم. جيھاز دا، اقشا دا، ءوزى دە جوق. ءۇيدىڭ بارلىعىن جابدىقتاۋعا تاپسىرىس بەرگەن ەدىم. ەندى نە ىستەرىمدى بىلمەي وتىرمىن»، دەيدى قالا تۇرعىنى ازامات راحمەت.
ازامات راحمەت الەۋمەتتىك جەلىدە جاريالانعان جارناماعا سەنىپ، جيھازعا تاپسىرىس بەرەدى. اقشاسىن دا كەلىسىمشارتتا كورسەتىلگەندەي بىردەن شوتقا اۋدارادى. الايدا كەيىن انىقتالعانداي قۇجات جالعان بولىپ شىقتى. وسى شەبەرمەن زاڭدى كۇشى جوق كەلىسىمشارت بەكىتكەن ون شاقتى تۇرعىننىڭ ءبارى الدانىپ قالعان. قازىر تەرگەۋ جۇمىسى ءجۇرىپ جاتىر.
«جيھاز جاساتۋعا ارنالعان كەلىسىمشارتقا وتە مۇقيات بولۋ كەرەك. وندا تاراپتاردىڭ دەرەكتەرى، قۇقىقتارى مەن مىندەتتەرى جازىلادى. تاۋار قاشان تولىق دايىن بولاتىنى، اقشانى قاي ۋاقىتتا تولەۋ كەرەك ەكەنى سول جەردە كورسەتىلەدى. ەگەر تاپسىرىس ۋاقىتىلى اياقتالماسا قانداي ايىپپۇل تولەنەتىنى كەلىسىم شارتتا بولۋى كەرەك»، دەيدى «قازاقستان زاڭگەرلەر وداعى» ر ق ب استانا فيليالىنىڭ ءتوراعاسى سەرىك بەرقامالوۆ.
مامانداردىڭ ايتۋىنشا، ادامداردىڭ ءوز قۇقىعىن تولىق بىلمەۋى - الدانىپ قالۋدىڭ باستى سەبەبى. ءتىپتى سولاي بولعاننىڭ وزىندە دە ءارى قاراي نە ىستەۋ كەرەك ەكەنىن كوبى بىلە بەرمەيدى. سونىمەن بىرگە جاۋاپسىز كاسىپكەرلەردىڭ ارنايى ءتىزىمىن جاساۋ كەرەك دەيدى. سوندا عانا ادامداردى الدايتىنداردى انىق بايقاۋعا بولادى.
«تۇتىنۋشىلار الدانىپ قالعان جاعدايدا بىزگە جۇگىنسە، كومەكتەسۋگە ءازىرمىز. شاعىم بويىنشا جەدەل ارەكەت ەتەمىز. بىرىنشىدەن، ءبىز ادامدارعا كەڭەس بەرەمىز، بەلگىلى ءبىر جاعدايدا ءوزىن قالاي ۇستاۋ كەرەكتىگىن ايتامىز. ەكىنشىدەن، ءبىز تەك سەنىم تەلەفوندارى بويىنشا عانا ەمەس، كەڭسەدە دە كەڭەس بەرەمىز. الەۋمەتتىك جەلىلەردە پاراقشالارىمىز بار. بارلىق ينستانتسيالار بويىنشا جەتەكشىلىك ەتەمىز»، دەيدى قازاقستان ۇلتتىق تۇتىنۋشىلار ليگاسىنىڭ باسقارما ءتوراعاسى سۆەتلانا رومانوۆسكايا.
سالا ماماندارىنىڭ ايتۋىنشا، قوماقتى قارجىعا تاۋار الاتىن كەزدە تەك تەكسەرىلگەن ادامدارعا جۇگىنۋ كەرەك. كەلىسىم- شارتتىڭ زاڭدى ەكەنىنە كوز جەتكىزىپ بارىپ قول قويۋ قاجەت. سونداي-اق كيۆي ءاميان ارقىلى اۋدارىمدار جاساعاندا ساق بولۋ ماڭىزدى ەكەنىن ەسكەرتەدى.
www.24.kz
