الماتىدا تاۋ كۋرورتتارىن بايلانىستىراتىن اسپالى جول سالىنۋى مۇمكىن - مينيسترلىك
«الماتى جانە شىعىس ءوڭىرى شاڭعى تۋريزمىن دامىتۋعا وتە قولايلى. بىزدە قۇرعاق قار، ۇزاق ماۋسىم، جىلدىڭ شۋاقتى كۇندەرى كوپ. سوندىقتان الماتى ايماعى بۇل باعىتتا مىندەتتى تۇردە قادام جاساۋى كەرەك. بۇل جەردە الەۋەت بار ەكەنىنە سەنىمدىمىن. ءبىز مەملەكەتتىك قولداۋ شارالارىن ازىرلەپ، زاڭعا ەنگىزە الدىق، ول - تاۋ شاڭعىسى كۋرورتىن سالۋ كەزىندە قىمبات قۇرال-جابدىقتاردىڭ قۇنىنىڭ 25 پايىزىن جەكەمەنشىككە قايتارۋ. بۇل - شىعىننىڭ تورتتەن ءبىرى. نەگىزى جاقسى قادام. تۇزەتۋ 2020 -جىلى كۇشىنە ەندى، ءبىراق پاندەمياعا بايلانىستى كۋرورتتارعا ۋاقىت بولمادى. قازىر قايتا جاندانىپ جاتىر. جاڭا باستامالار پايدا بولادى دەپ ويلايمىن»، - دەدى ەرجان ەركىنبايەۆ الماتىدا تۋريزم قاۋىمداستىعىنىڭ وكىلدەرىمەن كەزدەسۋ بارىسىندا.
ونىڭ ايتۋىنشا، الماتى قالاسىنىڭ اكىمى ەربولات دوسايەۆ شاڭعى ينفراقۇرىلىمىن دامىتۋعا ۇلكەن ءمان بەرىپ وتىر.
«تالعار مەن بۋتاكوۆكا شاتقالدارىن اسپالى جولمەن جانە شاڭعى تراسسالارىمەن بايلانىستىراتىن جوبا - شىنايى جوبا. ماماندار كورشى شاتقالداردى زەرتتەدى. وندا بىرنەشە كوتەرگىش سالىپ، شاڭعى تراسساسىن 70 شاقىرىمعا ۇزارتۋعا بولادى. شىمبۇلاقتان مەدەۋگە شاتقال ارقىلى تۇسۋگە بولادى»، - دەدى ۆيتسە-مينيستر.
ەرجان ەركىنبايەۆ بۇل ماڭىزدى جانە وتە قاجەت جوبا ەكەنىن اتاپ ءوتتى.
«ءبىراق بۇل جەر ۇلتتىق ساياباققا تيەسىلى. بۇل جەرگە اكىمدىكتىڭ دەمالىس ورنىن سالۋعا مۇمكىندىگى بار، سوندىقتان ماسەلەنى جۇيەلى تۇردە شەشۋ قاجەت. بيزنەس وكىلدەرى ءالى قىزىعۋشىلىق تانىتىپ وتىرعان جوق. كاسىپكەرلەر كوتەرگىشتەرگە تەحنيكالىق قىزمەت كورسەتۋ قىمباتقا تۇسەتىنىن ايتادى. بۇل ماسەلە بۇگىندە تالقىلانىپ جاتىر. ۇلتتىق ساياباقتىڭ اۋماعىندا مۇلدە قول تيگىزبەيتىن جەرلەر بار. قازىر تۋريزمدى دامىتۋعا قولايلى جەرلەردى اكىمدىككە بەرۋ ماسەلەسى تالقىلانۋ ۇستىندە. قازىردىڭ وزىندە الماتى ءوڭىرى تاۋ شاڭعىسى الاڭدارىن كەڭەيتۋ، كۋرورتتىق ايماق سالۋدى قاراستىرىپ جاتىر. مينيسترلىك بۇل يدەيانى قولداپ، مۇنداي جوبانى قارجىلاندىرۋدىڭ جەڭىلدەتىلگەن قۇرالدارىن ىزدەيدى»، - دەدى سپيكەر.
الماتى وبلىسىنداعى تاۋ شاڭعىسى كۋرورتتارى ءبىر اسپالى جولمەن بايلانىستىرىلاتىنى تۋرالى اقپارات 2019 -جىلى پايدا بولعان ەدى.
