قازاقستاندىقتاردىڭ ەمدەلۋ كەزىندە دەنساۋلىعىنا كەلتىرىلگەن زالال وتەلەدى
مۇنداي نورما مەديتسينا قىزمەتكەرلەرىنىڭ كاسىبي جاۋاپكەرشىلىگىن ساقتاندىرۋعا بايلانىستى جاڭا زاڭ جوباسىندا قاراستىرىلعان.
بۇل تۋرالى ءماجىلىس دەپۋتاتى عالىمجان ەلەۋوۆ ءمالىم ەتتى، دەپ حابارلايدى قازاقپارات.
دەنساۋلىق ساقتاۋ ماسەلەلەرىنە قاتىستى تۇزەتۋلەر قازىر ماجىلىستە قارالىپ جاتىر. ولاردى قابىلداۋ ناتيجەسىندە دەنساۋلىق ساقتاۋ ۇيىمدارى كورسەتەتىن مەديتسينالىق قىزمەتتەردىڭ ساپاسى دا ارتتىرىلماق.
«ءتيىستى زاڭ جوباسىن دەنساۋلىق ساقتاۋ مينيسترلىگى مەملەكەت باسشىسىنىڭ ۇلتتىق قوعامدىق سەنىم كەڭەسىنىڭ ءۇشىنشى وتىرىسىندا العا قويعان مىندەتتەرىن ىسكە اسىرۋ ماقساتىندا ازىرلەدى. پرەزيدەنت مەديتسينا قىزمەتكەرلەرىنىڭ قۇقىقتىق جانە قارجىلىق قورعالۋى مەن جاۋاپكەرشىلىگىنە، ونىڭ ىشىندە كاسىبي قىزمەتىنە كەپىلدىك بەرەتىن جۇيەنى ازىرلەپ، ەنگىزۋدى تاپسىرعان بولاتىن.
حالىق دەنساۋلىعى جانە دەنساۋلىق ساقتاۋ جۇيەسى تۋرالى كودەكس پەن قىلمىستىق كودەكسكە، سونداي-اق «قازاقستان رەسپۋبليكاسىنىڭ مەملەكەتتىك ناگرادالارى تۋرالى» زاڭعا وزگەرىستەر مەن تولىقتىرۋلار ەنگىزۋ ۇسىنىلىپ وتىر. جالپى، تۇزەتۋلەر مەديتسينا قىزمەتكەرلەرىنىڭ مارتەبەسىن ارتتىرۋعا، پاتسيەنتتەر قۇقىقتارىن قورعاۋعا جانە مەديتسينالىق كومەك ساپاسىن ارتتىرۋعا باعىتتالعان»، - دەيدى ءماجىلىس دەپۋتاتى، دارىگەر، مەديتسينا عىلىمدارىنىڭ كانديداتى عالىمجان ەلەۋوۆ.
زاڭ جوباسى اياسىندا مەديتسينا قىزمەتكەرلەرىنىڭ كاسىبي جاۋاپكەرشىلىگىن قولدانىستاعى ساقتاندىرۋ كومپانيالارى ارقىلى بولجامدى ساقتاندىرۋ جۇيەسى ازىرلەنگەن.
«2023-جىلدان باستاپ مەديتسينالىق ۇيىمنىڭ ءوزى ساقتاندىرۋشى بولادى، ال 2025-جىلدان باستاپ مەديتسينالىق ۇيىم مەن مەديتسينا قىزمەتكەرى ساقتاندىرۋ جارنالارىن تەڭ ۇلەستە تولەيدى. بۇل بىرلەسكەن كاسىبي جاۋاپكەرشىلىككە اكەلەدى. بۇل رەتتە مەديتسينالىق ۇيىم پاتسيەنتتەردەن نەمەسە ولاردىڭ تۋىستارىنان تۇسكەن شاعىمداردى مەدياتسيانى جانە مامانداندىرىلعان مەديتسينالىق بىرلەستىكتەردى تارتا وتىرىپ ىشكى اۋديت قىزمەتى دەڭگەيىندە قارايتىن بولادى. كەلىسپەۋشىلىك تۋىنداعان جاعدايدا شاعىمدار ساراپتامالىق قورىتىندى بەرۋ ءۇشىن مەديتسينالىق جانە فارماتسيەۆتيكالىق باقىلاۋ كوميتەتىنىڭ اۋماقتىق بولىمشەلەرىنە بەرىلەدى»، - دەيدى دەپۋتات.
سونداي-اق، زاڭ جوباسىندا مەديتسينا نەمەسە فارماتسيەۆتيكا قىزمەتكەرىنىڭ كاسىبي مىندەتتەرىن تيىسىنشە ورىنداماعانى ءۇشىن قىلمىستىق قۇقىق بۇزۋشىلىقتاردى ىزگىلەندىرۋ جانە قىلمىستىق كودەكستىڭ 317-بابىنىڭ سانكسيالارىن ازايتۋ ۇسىنىلادى.
تۇزەتۋلەرگە مەملەكەتتىك جانە ۆەدومستۆولىق ناگرادالار دا ەنگىزىلەدى. ولار: ءبىرجولعى تولەممەن «قازاقستان رەسپۋبليكاسىنىڭ ەڭبەك سىڭىرگەن دارىگەرى» اتاعى، «ۇزدىك مامان» رەسپۋبليكالىق كونكۋرسىنىڭ جەڭىمپازى.
قازىرگى ۋاقىتتا زاڭ جوباسى قوعام بەلسەندىلەرى مەن دارىگەرلەردىڭ قاتىسۋىمەن جۇمىس توبىندا قارالىپ جاتىر.
