بوكستان ازيا چەمپيوناتىن سەرىك تەمىرجانوۆ جەڭىسپەن باستادى
قازاقستاندىق بوكسشى 57 كەلىگە دەيىن سالماقتا تۇركمەنستاندىق يحلاز گىلىچجانوۆپەن جۇدىرىقتاستى.
ءۇش راۋند بويى جەكپە-جەك س. تەمىرجانوۆتىڭ باسىمدىلىعىمەن ءوتىپ، تورەشىلەر ءبىر اۋىزدان جەڭىستى قازاقستاندىق سپورتشىعا بەردى.
سەرىك وتكەن جىلى سەربيا استاناسى بەلگرادتا وتكەن الەم چەمپيوناتىندا كۇمىس جۇلدەگەر اتانعان ەدى. ول - سونداي-اق جاستار اراسىندا ازيا چەمپيونى.
بۇگىن سونداي-اق كۇندىزگى سەسسيادا 63,5 كەلىگە دەيىنگى سالماقتا ءساناتالى تولتايەۆ وزبەكستاندىق رۋسلان ابدۋللايەۆپەن كەزدەسەدى.
كەشكى سەسسيادا توكيو وليمپياداسىنىڭ قولا جۇلدەگەرى ساكەن بيبوسىنوۆ 51 كەلىگە دەيىنگى سالماقتا ءۇندىستاندىق سپارش كۋمارمەن شەبەرلىك بايقاسادى.
ەسكە سالا كەتەيىك، بۇدان بۇرىن ازيا چەمپيوناتىندا قازاقستاندىق بوكسشىلاردىڭ قارسىلاسى انىقتالعانىن جازعان بولاتىنبىز.
