ۇيلەرى ورتەنىپ كەتكەن قوستانايلىقتاردىڭ جاڭا قونىستارىن ەندى سۋ باسىپ جاتىر
«اۋا تەمپەراتۋراسى جىلىنىپ، بىرنەشە كۇنگە سوزىلعان جاڭبىر مەن قار تۇرىندەگى جاۋىن-شاشىن سالدارىنان تۇرعىن ۇيلەردىڭ ىرگەسىندەگى اۋماقتا سۋ جينالدى. ينجەنەرلىك-گەولوگيالىق زەرتتەۋلەرگە سايكەس، ۇيلەردىڭ ىرگەتاسى ىلعالدان قورعالعان، ۇيلەرگە سۋ كىرمەيدى، سۋ باسۋ قاۋپى جوق»، - دەدى وبلىستىق قۇرىلىس، ساۋلەت جانە قالا قۇرىلىسى باسقارماسىنىڭ باسشىسى بەرىك تاڭجارىقوۆ.
ۇيلەردىڭ ماڭىنداعى سۋدى سورعىتۋ جۇمىستارى جۇرگىزىلىپ جاتىر. ارنايى تەحنيكا كەزەكشىلىككە شىعارىلعان.
قوستاناي وبلىسىنىڭ قۇرىلىس، ساۋلەت جانە قالا قۇرىلىسى باسقارماسىنىڭ باسپا ءسوز قىزمەتىنەن ءمالىم ەتكەندەي، جوبا بويىنشا سەپتيك ورناتۋ قاراستىرىلماعان، ال ۋاقىتشا تۇندىرعىشتار مەردىگەرلەر قاراجاتىنا ورناتىلعان.
«بىرلىك» شاعىن اۋدانىنداعى تۇرعىن ۇيلەردىڭ جەكە كارىز جۇيەسىنە جوبالىق-سمەتالىق قۇجاتتاما ازىرلەنىپ جاتىر. ج س ق دايىن بولعاننان كەيىن قۇرىلىس-مونتاجداۋ جۇمىستارى جۇرگىزىلەدى.
