باعدارلاما ءتىلىن قازاقشا سويلەتكەن سەرگەي شپەنگلەر
ءتىپتى، ءوزىمىز دە بۇل سالاعا كەلگەندە كىبىرتىكتەپ قالاتىنىمىز راس. سەبەبى وسىناۋ سالانىڭ ادەبيەتتەرى، قاجەتتى مالىمەتتەرى ءالى كۇنگە دەيىن رەسمي تىلدە. اۋدارىلعانىنىڭ ءوزى قۇلاققا جاعىمسىز ەستىلەدى.
ال وسى سالاداعى 22 جىلدىق ەڭبەك ءوتىلى بار ۇلتى نەمىس سەرگەي شپەنگلەر قازاق تىلىندە جۇيرىك سويلەپ قانا قويماي، باعدارلاما ءتىلىن مەملەكەتتىك تىلدە ەركىن جازا الادى. جەتىسايلىق سەرگەي اندرەيەۆيچ شىمكەنتتەگى ج. تاشەنەۆ ۋنيۆەرسيتەتىنىڭ سيفرلاندىرۋ ورتالىعىنىڭ جەتەكشىسى.
سەرگەي شپەنگلەر مەگاپوليسكە جۋىردا عانا كەلگەن. وعان دەيىن جوعارى وقۋ ورنىن ءبىتىرىپ كەلگەن 2001 -جىلدان بەرى شالعايداعى اۋىلدا ءجۇرىپ-اق اقپاراتتىق تەحنولوگيا سالاسى بويىنشا تالاي جۇمىستى ەڭسەرىپ تاستاپتى. ۋنيۆەرسيتەتتى ۇزدىك بىتىرگەن 12 عىلىمي ماقالانىڭ اۆتورى، ينفورماتيكا عىلىمدارىنىڭ ماگيسترى سەرگەي اندرەيەۆيچ بۇگىندە جۇمابەك تاشەنەۆ ۋنيۆەرسيتەتىنىڭ ماقتانىشى.
2005 -جىلدان 2020 -جىلعا دەيىن زاماناۋي اقپاراتتىق تەحنولوگيالاردى قولدانا وتىرىپ، 260 ەلەكتروندىق وقۋلىق جاساعان. وسى ەلەكتروندى وقۋلىقتاردىڭ 11 نىڭ اۆتورى.
2010 -جىلى بۇرىنعى جەتىساي قالاسىنداعى «سىرداريا» ۋنيۆەرسيتەتىنىڭ (قازىر شىمكەنت قالاسىنا كوشىپ، اتاۋى ج. تاشەنەۆ دەپ وزگەرگەن) ەلەكتروندى كىتاپحاناسىن ىسكە قوسىپ، ونى جىل سايىن جاڭا ەلەكتروندى باسىلىمدارمەن تولىقتىرىپ وتىرعان.
ۋنيۆەرسيتەتتىڭ كىتاپ قورىنان 1500 دەن استام كىتاپتى تسيفرلاندىرۋدى ۇيىمداستىردى، سونىڭ ارقاسىندا «سىرداريا» ۋنيۆەرسيتەتى ەلەكتروندى باسىلىمداردىڭ سانى بويىنشا ۋنيۆەرسيتەتتەر قاۋىمداستىعى مۇشەلەرى اراسىندا كوشباسشى بولدى. ۋنيۆەرسيتەتتىڭ ەلەكتروندى كىتاپحاناسى قازاقستان جوعارى وقۋ ورىندارىنىڭ ىشىندە ۇشتىككە ەنگەن ەڭ تانىمال كىتاپحانالاردىڭ ءبىرى بولىپ تۇر. قازىر ۋنيۆەرسيتەتتىڭ بارلىق 9500 ەلەكتروندى رەسۋرسى ەلىمىزدەگى ج و و-ى قاۋىمداستىعىنىڭ قورىنا ەنگىزىلگەن. وتكەن جىلدىڭ قورىتىندىسىمەن ۋنيۆەرسيتەت شپەنگلەردىڭ ارقاسىندا ەلەكتروندى كىتاپتاردى جۇكتەپ الۋ سانى بويىنشا ءۇشىنشى، ال رەسۋرستاردىڭ جالپى سانى بويىنشا ءتورتىنشى ورىندا تۇر.
بارلىق رەسۋرستىڭ 52 پايىزى قازاق، قالعانى ورىس جانە اعىلشىن تىلىندە. «بۇگىندە وقۋ ورنىنىڭ ەلەكتروندى كىتاپحاناسىنىڭ قورى اي سايىن وقۋ ۇدەرىسىندە سۇرانىسقا يە جاڭا ەلەكتروندى باسىلىمدارمەن تولىقتىرىلىپ وتىرادى. كىتاپتاردى سكانەرلەۋ ارقىلى قور قالىپتاسادى. قازىر وقىتۋشىلارمەن بىرلەسىپ جاڭا مۋلتيمەديالىق ەلەكتروندى وقۋلىقتار ازىرلەنۋدە»، - دەيدى سەرگەي ادرەيەۆيچ بىزبەن اڭگىمەسىندە.
ودان بولەك، سەرگەي 2009 -جىلدان 2020 -جىلعا دەيىن ستۋدەنتتەردىڭ بىلىكتىلىگىن ارتتىرۋ كۋرستارىن ۇيىمداستىرىپ، 12 جىلدا 2000 نان استام ستۋدەنتتى ۇيرەتكەن. سونىمەن بىرگە پروفەسسور- وقىتۋشىلار قۇرامى اراسىندا بىلىكتىلىكتى ارتتىرۋ كۋرستارىن جۇرگىزىپ كەلەدى. ورىس، قازاق جانە اعىلشىن ءتىلىن ەركىن مەڭگەرگەن شپەنگلەر كەرىسىنشە نەمىس تىلىنە كەلگەندە ازداپ كىبىرتىكتەيتىنىن جاسىرمادى. ورتا مەكتەپتى ورىس تىلىندە وقىعانىمەن، «ينفورماتيكا» ماماندىعى بويىنشا تۇركىستانداعى ق. ياساۋي اتىنداعى قازاق-تۇرىك ۋنيۆەرسيتەتىن قازاق تىلىندە قىزىل ديپلوممەن ءتامامداعان ول اينالامەن قارىم-قاتىناس ارقىلى تەز ۇيرەنگەنىن ايتادى. ال ءبىز ونىڭ قازاق تىلىندە سويلەگەنىنە ەمەس، باعدارلاما ءتىلىن قازاقشا سويلەتكەنىنە سۇيسىندىك.
شىمكەنت قالاسى
aikyn.kz
