جولى تۇزەلىپ، جەرى كوركەيگەن التاي
حالىقتى ساپالى سۋمەن قامتاماسىز ەتۋ جانە سۋدى بۇرۋ بويىنشا 557,2 ميلليون تەڭگەگە وسى جىلعا 14 جوبانى جۇزەگە اسىرۋ جوسپارلانعان بولاتىن. بۇگىندە 170 ميلليون تەڭگەگە جەتى نىسان سۋمەن قامتىلدى. اتاپ ايتساق، چاپايەۆو، نيكولسك، ماياك اۋىلدارى، بۇقتىرما ستانساسى، وكتيابرسكي كەنتى، پارىگينو اۋىلىنداعى سۋ مۇناراسى، كرەمنيۋحا اۋىلىندا 12 سۋ قۇدىعى بۇرعىلاندى. سونىمەن قاتار 70 ميلليون تەڭگەگە بۇقتىرما جانە زاۆودسكايا اۋىلىنداعى جاڭا بۇقتىرما كوشەلەرىندەگى سۋ جەلىسىنىڭ جوندەۋ جۇمىستارى ءجۇرىپ جاتىر. ال 5,5 ميلليون تەڭگەگە سرەديگوريە اۋىلىنىڭ جەلىلەرى جوندەلەدى.
مىسالى، التاي قالاسىنىڭ وزىندە جالپى ۇزىندىعى 185 شاقىرىمدىق جانە ورتالىق سۋ قۇبىرى جەلىلەرى قايتا جاڭارتىلدى. بۇگىندە جۇمىستىڭ 90 پايىزى ورىندالعان. ونىڭ ىشىندە ۇڭعىمالاردى مونتاجداۋ جۇمىسى، تۇرعىن ۇيلەرگە جەلىلەردى قوسۋ جانە ونىڭ قۇرىلعىلارىن ورناتۋ جۇمىستارى كىرەدى. 2022 -جىلعا 290 ميلليون تەڭگە جۇمسالدى. وعان قوسا، 13 ميلليون تەڭگەگە التاي قالاسىنداعى جەلىلەردى جۋۋ جانە تازالاۋ جۇمىستارى جۇرگىزىلۋدە.
جول-كولىك ينفراقۇرىلىمىن دامىتۋ بويىنشا 767,3 ميلليون تەڭگەگە 14 جوبا جۇزەگە اسىرۋ جوسپارلانىپ وتىر. مىسالى، «اۋىل - ەل بەسىگى» باعدارلاماسىن ىسكە اسىرۋ اياسىندا رەسپۋبليكالىق جانە وبلىستىق بيۋدجەت قاراجاتى ەسەبىنەن سولوۆيەۆو، تۇرعىسىن، پوليانسكوە، مالەيەۆسك پەن زۋبوۆسك اۋىلدارىندا جالپى ۇزىندىعى 19 شاقىرىمدى قامتيتىن جول 382,3 ميلليون تەڭگەگە جوندەلدى.
210 ميلليون تەڭگەگە «تەحنولوگيالىق تاسجولى مەن پارىگينو اۋىلى اپاراتىن جول ورتاشا جوندەۋدەن ءوتتى. «شالەلابالە» دەمالىس ورتالىعىنا بارار جول، ياعني بۇقتىرما سۋ قويماسىنىڭ جاعالاۋىنداعى جولدى جاساۋعا 50 ميلليون تەڭگە كەتتى. ەگەر جاڭا بۇقتىرما اۋىلىنىڭ ماڭىنداعى ۇلكەن جول جوندەلسە، 20 شاقتى ءىرى دەمالىس ورنىنا جول اشىلادى. سونىڭ ارقاسىندا دەمالۋشىلار سانى كوبەيەدى. نەگىزى، التاي اۋدانى - كورىكتى تابيعاتقا تۇنعان ولكە. تاۋى دا، ورمان، كولى دە بار. سارقىراما مەن تۇماعا دا باي. سوندىقتان ەندىگى ماقسات - ايماقتىڭ ءتۋريزمىن دامىتۋ. سونىڭ ءبىرى - دەمالىس ورىندارىن ينتەرنەتپەن قامتاماسىز ەتتى. مىسالى، كرەمنيۋحا اۋىلىنا انتەنا ورناتۋ ءۇشىن اۋداندىق بيۋدجەتتەن 9 ميلليون تەڭگە ءبولىندى. قازىر ەلدى مەكەنگە انتەنا ورناتىلدى، ەندى قوسۋ عانا قالدى.
بيىلدىڭ وزىندە ايماقتى جارىقپەن قامتۋعا 90 ميلليون تەڭگە ءبولىندى. بۇل قاراجاتقا 6 جوبانى جۇزەگە اسىرۋ جۇكتەلگەن. مىسالى، وكتيابرسكي اۋىلىنىڭ باسىم كوپشىلىك كوشەسىنە ەلەكتر جەلىسى جاڭارتىلسا، سەلەزنيەۆكا ستانساسى جارىق قۇرىلعىسى قويىلدى. سونىمەن قاتار 21,5 ميلليون تەڭگەگە التاي قالاسىنىڭ لومونوسوۆ كوشەسى جارىقتاندىرىلادى. ال وكتيابر اۋىلىنداعى لەنين كوشەسىن جارىقتاندىرۋعا 12 ميلليون تەڭگە جۇمسالدى. قالاداعى تاۋەلسىزدىك اللەياسىنىڭ فونتانىن ءتۇرلى ءتۇستى ساۋلەمەن جارىقتاندىرۋ قۇرىلعىسى 5 ميلليون تەڭگەگە شىقتى.
باستىسى، تۇرعىنداردىڭ تۇرمىس- تىرشىلىگىنە قاجەتتى دۇنيەنى رەتكە كەلتىرۋدە. ماسەلەن، وزەكتى پروبلەمانىڭ ءبىرى - جىلىتۋ ماسەلەسى. سەرەبريانسك قالاسىنداعى جانە جاڭا بۇقتىرماداعى ەكى قازاندىقتى جوندەۋ ءۇشىن جەرگىلىكتى اۋداننىڭ بيۋدجەتىنەن 135 ميلليون تەڭگە قارجىلاندىرىلدى. تيىسىنشە، جىلىتۋ ماۋسىمىنا دايىندىق ۇلكەن قارجىنى قاجەت ەتەدى. ونىڭ ىشىنە جىلىتۋ قازاندىقتارىن جوندەۋ عانا ەمەس، قۇرىلعىلاردى جاڭارتىپ، كومىر ساتىپ الۋى تاعى بار.
ولكەنىڭ قۇرىلىس سالاسى دا قارقىندى دامىپ جاتىر. التاي قالاسىنداعى 10-شاعىناۋداندا ورنالاسقان رۋدنوي 31/11 كوشەسىندەگى 60 پاتەرلىك تۇرعىن ءۇيدىڭ قۇرىلىسى اياقتالۋدا. وعان بولىنگەن قارجىنىڭ 369 ميلليون تەڭگەسى يگەرىلدى. قازىر باسپانا تۇرعىزىلدى، ءۇيدىڭ ىشكى جوندەۋ جۇمىستارى ءالى جۇرگىزىلىپ جاتىر. ءبىراق قاراشا ايىنا دەيىن پاتەرلەرگە جىلۋ قوسىلماق.
«ءبىر قاباتتى شىعىس» باعدارلاماسى بويىنشا 16 ءۇي ساتىپ الۋ جوسپارلانعان، ازىرگە 13 ءۇي ساتىپ الىندى. قالعان ۇشەۋى جىل سوڭىنا دەيىن ساتىپ الىنادى. ءۇيدىڭ جالپى اۋماعى - 1440 شارشى مەتر. بۇل باسپانا كوپبالالى وتباسىلار مەن اۋدانداعى بيۋدجەتتىك سالادا جۇمىس ىستەيتىن قىزمەتكەرلەرگە ارنالعان.
اكىمدىكتىڭ مالىمەتىنشە، اۋداندىق بيۋدجەت ەسەبىنەن سەرەبريانسك قالاسىندا، سولوۆيەۆو، تۇرعىسىن مەن چاپايەۆو، زۋبوۆسك مەن بۇقتىرما، فەكليستوۆكا اۋىلدارىندا 40 ميلليون تەڭگەگە بالالارعا ارنالعان ويىن الاڭدارى ورناتىلدى. وعان قوسا، التاي قالاسىنداعى سولنەچنايا، فرۋنزە، ستاحانوۆسكايا 3 كوشەلەرىندە جاياۋ جۇرگىنشىلەر جولى جوندەلىپ، لومونوسوۆ، فرۋنزە كوشەلەرىنە ايالدامالار جاڭارتىلدى.
