قازاق قىزى قىتايدىڭ «ۇزدىك اكتريسا» سىيلىعىن الدى

بيىل 33- رەت ۇلەستىرىلىپ وتىرعان Flying Apsaras سىيلىعى قىتايدىڭ تەلەونەر سالاسىنداعى ەڭ جوعارى مەملەكەتتىك ماراپاتى. ريزا ءالىمجان قىزى «Minning Town» تەلەحيكاياسىنداعى ءرولى ءۇشىن «ۇزدىك اكتريسا» نوميناتسياسىنىڭ يەگەرى اتاندى.

«Minning Town» تەلەحيكاياسى وتكەن جىلى قاڭتار ايىندا قىتايداعى كورەرمەنى ەڭ كوپ بەس تەلەارنادا قاتار كورسەتىلىپ، جۇرت وتە جوعارى باعالاعان ەدى. وعان قىتايدىڭ نينسيا دۇنگەن اۆتونوميالىق رەگيونىنىڭ سيحايگۋ ايماعىنداعى اۋىل تۇرعىندارىنىڭ كەدەيلىكپەن كۇرەسى ارقاۋ بولادى. تەلەحيكايادا ريزا قازىمىر اكەنىڭ قاتال ۇكىمىنە مويىن ۇسىنباي، تاعدىرىن ءوز قولىنا العان قايسار قىز لي شۋيحۋانىڭ بەينەسىن سومداپ، اكتەرلىك شەبەرلىگىمەن كورەرمەندەردى ءتانتى ەتەدى.

1- قاراشا كەشتە بەيجىڭدەگى شوۋگان ارەناسىندا وتكەن سىيلىق يەگەرلەرىن ماراپاتتاۋ راسىمىندە ريزا ءالىمجان قىزى تولقىپ تۇرىپ: «مەن باقىتتى ءھام تالايلى جان ەكەنمىن. قازىلار القاسىنا، ەڭبەگىمدى باعالاعان كورەرمەندەرگە مىڭ العىس. وزدەرىڭىزگە انا تىلىمدە العىسىمدى بىلدىرۋگە رۇقسات ەتىڭىزدەر، راقمەت!» دەپ اعىنان جارىلدى.

اشىق دەرەككوز بويىنشا، ريزا ءالىمجان قىزى 1986 -جىلى شىلدەدە بەيجىڭدە تۋعان. ونەر جولىن ورتا مەكتەپتە اۋەسقوي مودەل بولۋدان باستاعان، 2002 -جىلى بەيجىڭ كينەماتوگرافيا ينستيتۋتىن ءبىتىرىپ، اكتەرلىككە بەت بۇرادى. 2011 -جىلى «جەن حۋان-نىڭ كەشۋلەرى» تەلەحيكاياسى ارقىلى تانىلدى.

وسىلايشا تالانىتتى قانداسىمىز اۋديتورياسى ۇلكەن قىتايدىڭ كينو يندۋسترياسىنا قۇلاش ۇرىپ، ءوز قولتاڭباسىمەن كورەرمەن ىقىلاسىنا بولەنگەن كوپتەگەن فيلمدەرگە تۇسەدى. ول كومەديالىق «سۋايتتار شايقاسى» كينوسىندا، پاتشا ورداسىنداعى قىرىقپىشاق بولىپ قىرىلىسىپ جاتاتىن كۇندەس حانىمدار تۋرالى «گارەمدەگى جۋان حۋاننىڭ ءومىرى» تەلەحيكاياسىندا، بۇگىنگى قالا ومىرىندەگى ماحاببات تاقىرىبى ارقاۋ بولعان «ماحاببات پا، وعان مەن دايىن» تەلەفيلمىندە جانە «ماحاببات بۇيرىقتان اسا المايدى»، «ءبىز عانا بىلەتىن مەكەن»، «شىندىق ايتىلمايتىن ايماق»، «قارلى دالاداعى ايەل پاتشا»، «قۋعىنداۋ» سەكىلدى كوپتەگەن فيلمدە ءرولىن ءساتتى سومداپ شىعادى.

ريزا 2017 -جىلى «قۋعىنداۋ» فيلىمىندەگى ءرولى ءۇشىن XX شانحاي حالىقارالىق كينو فەستيۆالىندە «ب ا ق- تىڭ نازارىن ءجيى اۋدارعان اكتريسا» نوميناتسياسىندا ماراپاتتالادى.

ال، 2019 -جىلى «چاڭانداعى ءبىر تاۋلىك» اتتى تەلەفيلمىندەگى ءرولى ءۇشىن قىتايدىڭ Huading بايقاۋىندا ەڭ «ۇزدىك اكتريسا» اتانادى.

سونداي-اق، ريزانىڭ 2020 -جىلى تۇسكەن «تاۋ- تەڭىزدەي ماحاببات» فيلمى 2021 -جىلدىڭ قاڭتار ايىندا كورەرمەنگە جول تارتىپ، حالىقتىڭ جاقسى باعاسىنا يە بولدى.

فوتو: thepaper.cn

اۆتور

ەرلان مازان

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى