ۇلتتىق تاربيە مودەلى «تولىق ادام» ىسكە اسىرىلادى - وقۋ- اعارتۋ مينيسترلىگى

«تۇجىرىمدامادا تاربيەنىڭ، ادامي قۇندىلىقتاردىڭ، وتباسىلىق تاربيەنىڭ ماڭىزدىلىعى ەرەكشە ورىن الدى. وقىتۋ بارىسىندا «قۇندىلىقتارعا باعىتتالعان ءبىلىم بەرۋ» ءتاسىلى قولدانىلادى. بىلىمگە قۇشتارلىق، ەڭبەكقورلىق، وتانسۇيگىشتىك، ۇلتتىق مۇرانى قاستەرلەۋ، ءبىر- بىرىمەن سىيلاستىق پەن ىنتىماقتاستىق، مەيىرىمدىلىك پەن قامقورلىق، مەملەكەتتىك مۇددەنى قورعاۋعا دايىن بولۋ سياقتى نەگىزگى قۇندىلىقتار اياسىندا «تولىق ادام» ۇلتتىق تاربيە مودەلى ىسكە اسىرىلادى»، - دەدى ا. ايماعامبەتوۆ.

سونىمەن قاتار ول بالالاردى ۇيىرمەلەرمەن قامتۋ باعىتىنا توقتالدى.

«قازىرگى كەزدە قامتۋ كورسەتكىشى 70 پايىزدى قۇرادى. وقۋشىلار سارايلارى، جاس تەحنيكتەر ستانسيالارى، مۋزىكا جانە ونەر مەكتەپتەرى، بالالار تەحنوپاركتەرى اشىلادى. ءبىلىم بەرۋ ۇيىمدارىندا پىكىرتالاس قوزعالىسى، مەكتەپ جانە ستۋدەنتتىك ءوزىن- ءوزى باسقارۋ بەلسەندى دامىپ كەلەدى. دەبات قوزعالىسىن جانە مەكتەپتەردىڭ پارلامەنتتەرىن بارلىق وقۋ ورنىندا دامىتامىز»، - دەدى مينيستر.

ونىڭ سوزىنە قاراعاندا، شاحماتتى ەلىمىزدە كەڭىنەن ناسيحاتتاۋ باعىتىندا ءبىلىم بەرۋ ۇيىمدارىنا قولداۋ جاسالادى. وسى ورايدا قازىر فاكۋلتاتيۆ رەتىندە 28 مىڭعا جۋىق بالاعا ارنالعان 600-دەن استام مەكتەپتە ەنگىزىلدى. ال مەكتەپتەردەگى شاحمات سەكسيالارىندا 200 مىڭنان استام بالا قامتىلدى.

«بالالاردى كىتاپ وقۋعا باۋلۋ جۇمىستارى جۇيەلى تۇردە ۇيىمداستىرىلادى. «وقۋعا قۇشتار مەكتەپ» جوباسى ىسكە اسىرىلادى. سوڭعى ەكى جىلدا مەكتەپ كىتاپحانالارىنا 3,6 ميلليون بالالار كوركەم ادەبيەتى ساتىپ الىندى، ونىڭ 71 پايىزى مەملەكەتتىك تىلدە. بۇل شىن مانىندە كەرەمەت جوبا. ودان ءارى كوركەم ادەبيەت قورى جاڭارتىلادى. اسىرەسە، قازاق تىلىندەگى عىلىمي- فانتاستيكالىق ادەبيەتپەن، تانىمدىق ادەبيەتپەن قامتاماسىز ەتۋ جۇمىسى جالعاسادى»، - دەدى ۆەدومستۆو باسشىسى.

فوتو: t.me/KZgovernment

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى