مۇحتار تىلەۋبەردى گەرمانيا سىرتقى ىستەر مينيسترىمەن كەزدەستى
بۇل تۋرالى بۇگىن ەلوردادا قازاقستان پرەمەر- ءمينيسترىنىڭ ورىنباسارى - سىرتقى ىستەر ءمينيسترى مۇحتار تىلەۋبەردى ايتتى، دەپ حابارلايدى قازاقپارات ءتىلشىسى.
«بۇگىن ءبىز گەرمانيانىڭ فەدەرالدىق سىرتقى ىستەر ءمينيسترى اننالەنا بەربوك ەكەۋمىز ناتيجەلى ءارى سەنىمدى كەلىسسوزدەر وتكىزدىك. ءبىز ەكىجاقتى ساياسي، ەكونوميكالىق جانە مادەني- گۋمانيتارلىق بايلانىستاردىڭ قازىرگى جاي- كۇيى مەن ولاردى تەرەڭدەتۋ مۇمكىندىكتەرىن تالقىلادىق، سونداي- اق حالىقارالىق كۇن تارتىبىندەگى ءبىرقاتار ماسەلە بويىنشا پىكىر الماستىق. قازاقستان مەن گەرمانيا اراسىنداعى ديپلوماتيالىق قارىم- قاتىناستاردىڭ 30 جىلدىعى اياسىندا ءبىز سەنىمدى ساياسي ديالوگ پەن ساۋدا- ەكونوميكالىق جانە ينۆەستيتسيالىق سالالارداعى تۇراقتى ءارى ءوزارا ءتيىمدى ىنتىماقتاستىقتىڭ جوعارى دەڭگەيىن اتاپ وتتىك»، - دەدى م. تىلەۋبەردى گەرمانيانىڭ فەدەرالدىق سىرتقى ىستەر مينيسترىمەن كەزدەسۋدەن كەيىن.
وسى ورايدا مينيستر كوپۆەكتورلى سىرتقى ساياسي باعىتىمىزدىڭ ساباقتاستىعى اياسىندا گەرمانيامەن جانە جالپى ەۋروپا وداعىمەن ءوزارا ءىس- قيمىل قادامدارىن دامىتۋعا ەكپىن قويىلىپ وتىرعانىن ايتتى.
«بەربوك حانىم، ءسىزدىڭ ساپارىڭىز ەلدەر اراسىنداعى ەكونوميكالىق ىنتىماقتاستىق پەن ساياسي ديالوگقا، سونداي- اق حالىقارالىق بايلانىستاردى جانداندىرۋعا قوسىمشا سەرپىن بەرەتىنىنە سەنىمدىمىن.
ءبىز گەرمانيا بۋندەستاگ دەپۋتاتتارىنىڭ كەلگەنىنە جانە ولاردىڭ قازاقستان پارلامەنتى وكىلدەرىمەن كەزدەسۋىنە قۋانىشتىمىز. پارلامەنتاريزمدى دامىتۋ ماسەلەلەرى بويىنشا، اسىرەسە، ەلدە ادىلەتتى قازاقستاندى قۇرۋعا باعىتتالعان اۋقىمدى ساياسي جانە الەۋمەتتىك رەفورمالار اياسىندا بەلسەندى پىكىر جانە تاجىريبە الماسىلاتىنىنا سەنىمدىمىن. سونىمەن قاتار، ءبىز گەرمانيا ەكونوميكاسىنىڭ جەتەكشى سەكتورلارىنىڭ وكىلدەرى كىرەتىن ءىرى بيزنەس دەلەگاتسيانىڭ كەلگەنىنە ريزاشىلىعىمىزدى بىلدىرەمىز»، - دەدى مۇحتار تىلەۋبەردى.
اۆتور
رۋسلان عابباسوۆ
