قازاق بالۋاندارى - «تۇران بارىسىنىڭ» جەڭىمپازى اتاندى

جارىسقا تۇركى مەملەكەتتەرى ۇيىمىنىڭ مۇشەلەرى - تۇركيا، وزبەكستان، ازەربايجان، قىرعىزستان، ماجارستان جانە قازاقستان بالۋاندارى قاتىسىپ، ءوزارا مىقتىنى انىقتادى.

ءدۇبىرلى سىندا بالۋاندار ەكى توپقا ءبولىنىپ، اينالمالى جۇيەدە كۇرەستى. ەكى توپتان ىرىكتەلگەن ازەربايجان، قىرعىزستان، وزبەكستان، قازاقستان قۇراما كوماندالارى جۇلدەلى ورىندارعا تالاستى. ءدۇبىرلى دودانىڭ اشىلۋ سالتاناتىندا مادەنيەت جانە سپورت ءمينيسترى داۋرەن ابايەۆ تۇركىستان تورىندەگى جارىستىڭ ماڭىزىنا توقتالدى. ۇلتتىق سپورتتى دامىتۋعا مينيسترلىك تاراپىنان قولداۋ ءاردايىم جالعاسا بەرەتىنىن جەتكىزدى. ال تۇركىستان وبلىسىنىڭ اكىمى دارحان ساتىبالدى بالۋاندارعا ساتتىلىك تىلەدى. «قازاق كۇرەسى» - ۇلتتىق سپورت تۇرلەرىنىڭ ىشىندە وزىندىك ورنى بار ەرەكشە سپورتتىڭ ءتۇرى. قازىرگى ۋاقىتتا الەمنىڭ 40 تان اسا مەملەكەتىندە ۇلتتىق كۇرەسىمىزدەن فەدەراتسيالار قۇرىلىپ، جۇمىس اتقارۋدا.

وزدەرىڭىزگە بەلگىلى، ۇلتتىق سپورتىمىز - قازاق كۇرەسىنەن الەم، ازيا، افريكا جانە ەۋروپا چەمپيوناتتارى وتكىزىلىپ، دامۋدىڭ جاڭا دەڭگەيىنە كوتەرىلدى. كەيىنگى ون جىل بەدەرىندە جوعارى دەڭگەيدە ۇيىمداستىرىلىپ، وتكىزىلەتىن «قازاقستان بارىسى»، «ەۋرازيا بارىسى» جانە «الەم بارىسى» دودالارى دا بۇگىندە كورەرمەن كوزايىمىنا اينالىپ وتىر. مىنە، بۇگىن قاسيەتتى تۇركىستاندا ەرەسەكتەر اراسىنداعى قازاق كۇرەسىنەن «تۇران بارىسى» ازيا كۋبوگى وتەدى. بۇل ءىس- شارالاردىڭ بارلىعى بۇقارا حالىق اراسىندا سالاماتتى ءومىر سالتىن ناسيحاتتاۋعا، سپورتتىق ءداستۇر مەن ادەت- عۇرىپتاردى ساقتاۋعا وزىندىك زور ۇلەسىن قوسۋدا. اتالعان باعىتتارداعى جۇمىستار الداعى ۋاقىتتا دا ءوز جالعاسىن تاباتىن بولادى»، دەدى وبلىس اكىمى.

ۇلتتىق سپورتتى ناسيحاتتاۋ ماقساتىندا شەتەلدەردە 30 دان استام قازاق كۇرەسى فەدەراتسياسى جۇمىس ىستەيدى. بۇگىندە ەلىمىزدە وسى سپورت تۇرىمەن 120 مىڭنان استام جاس شۇعىلدانادى. ەلىمىزدە ءتۇرلى دەڭگەيدە 800 دەن استام جارىس وتكىزىلەدى. سونىمەن بىرگە حالىقارالىق دەڭگەيدە ازيا كۋبوگى، ازيا جانە الەم چەمپيوناتتارى سەكىلدى حالىقارالىق تۋرنيرلەر وتەدى.

مادەنيەت جانە سپورت مينيسترلىگى مەن وبلىس اكىمدىگىنىڭ، سونداي-اق «Qazaq kuresى» اسسوتسياتسياسى، «Qazaqstan barysy» قازاق كۇرەسىن قولداۋ جانە دامىتۋ قورىنىڭ ۇيىمداستىرۋىمەن وتكەن ءتۋرنيردىڭ باس سەرىكتەستەرى - «سامۇرىق-قازىنا» ۇ ءا ق» ا ق پەن «تۋريزم مەن سپورتتى قولداۋ جانە دامىتۋ قورى».

ءدۇبىرلى دوداعا تۇركى ەلدەرىنىڭ ەڭ مىقتى سپورتشىلارى قاتىستى. ولاردىڭ اراسىندا قازاق كۇرەسىمەن قوسا، باسقا دا كۇرەس تۇرلەرىنەن حالىقارالىق جارىستاردا جۇلدە الىپ جۇرگەن سپورتشىلار بار. مىسالى، ازەربايجان قۇراماسى اتىنان سامبودان ەكى دۇركىن الەم چەمپيونى ەيۆاز باقشييەۆ (60 ك گ) باق سىنادى. ال ماجارستان قۇراماسى ساپىندا دزيۋدودان ەۋروپا چەمپيونى ەندرە گۋنيچ (82 كگ) ، دزيۋدودان الەم چەمپيوناتىنىڭ كۇمىس جۇلدەگەرى، ەۋروپانىڭ ءۇش دۇركىن چەمپيونى بارنا بووۋر (+90 ك گ) ازيا كۋبوگىندە جەڭىس تۇعىرىنان كورىنۋگە بارىن سالدى. دزيۋدودان ەۋروپا چەمپيونى اتانعان تۇركيالىق فۋركان گۇنەر دا ايانىپ قالمادى.

قازاق كۇرەسىنەن ءوتىپ جۇرگەن حالىقارالىق جارىستاردا جاقسى ونەر كورسەتكەن وزبەكستان قۇراماسى ساپىندا الەم چەمپيونى ۋميد ەسانوۆ (82 ك گ)، الەم چەمپيونى، دزيۋدودان ازيا چەمپيونى ەركىن كوزوكوۆ (90 ك گ)، ءۇش دۇركىن الەم چەمپيونى، قازاق كۇرەسىنەن ەكى دۇركىن الەم چەمپيونى مۋحسين حيسوميددينوۆ (+90 ك گ) بوزكىلەمگە شىقتى. ال قازاقستان ساپىندا 90 كيلو سالماقتا بەلدەسكەن ايداربەك توقتاربەك بىلتىر قازاق كۇرەسىنەن الەم چەمپيونى اتانعان بولاتىن. 90 كيلودان جوعارى سالماقتا عالىمجان قىرىقباي - «قازاقستان بارىسى» رەسپۋبليكالىق تۋرنيرىنىڭ 2021 -جىلعى كۇمىس، 2022 -جىلعى قولا جۇلدەگەرى.

ەلىمىزدەگى ۇلتتىق سپورت ءتۇرىن دامىتۋ جانە قولداۋ ماقساتىندا ۇيىمداستىرىلعان، تارتىسقا تولى كۇرەس باسەكەسىنىڭ جارتىلاي فينالىندا ازەربايجان بالۋاندارىن قاپى قالدىرعان قىرعىز ورەندەرى قولا جۇلدەنى يەلەندى. ال اقتىق ايقاس قازاقستان مەن وزبەكستان بالۋاندارى اراسىندا ءوتتى.

ايتۋلى دودانىڭ اقتىق باسەكەسىندە 4:3 ەسەبىمەن قازاقستان بالۋاندارى باسىم ءتۇسىپ، «Turan barysy» دوداسىنىڭ جەڭىمپازى اتاندى. العاش رەت ۇيىمداستىرىلعان كۇرەس سايىسىندا ءبىرىنشى ورىن العان كوماندا

10000000 تەڭگە كولەمىندە قارجىلاي سىيلىق السا، ەكىنشى ورىنعا - 6000000، ءۇشىنشى ورىنعا 4000000 قارجىلاي سىيلىق جانە ارنايى كۋبوك تابىس ەتىلدى.

«ەگەمەن قازاقستان»

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى