قىتاي يۋانى الەمدە ەڭ كوپ ساتىلاتىن بەسىنشى ۆاليۋتاعا اينالدى

بانك ەسەبىنە سايكەس، قىتاي يۋانىنىڭ ساۋداسى 2019 –جىلعى % 4 سالىستىرعاندا 2022 -جىلى الەمدىك ۆاليۋتا اينالىمىنىڭ % 7- ىن قۇرادى. ا ق ش دوللارى نارىقتاعى % 90- عا جۋىق ۇلەسىمەن ءوزىنىڭ ۇستەم جاعدايىن ساقتاپ قالدى، ال ەۋرونىڭ ۇلەسى % 31- عا دەيىن ازداپ تومەندەپ، ەكىنشى ەڭ بەلسەندى ساۋدالانعان ۆاليۋتا بولىپ قالدى. جاپون يەنى (% 17) مەن فۋنت ستەرلينگ (%13) العاشقى «بەستىكتەگى» پوزيتسيالارىن ساقتاپ قالدى.

بيرجادان تىس ۆاليۋتا نارىقتارىنداعى ساۋدا كولەمى 2022 -جىلدىڭ ساۋىرىندە كۇنىنە 7,5 تريلليون دوللارعا جەتتى. بۇل ءۇش جىل بۇرىنعى 6,6 تريلليون دوللاردان % 14- عا ءوسىپ، جاڭا رەكورد ورناتتى.

بانك ەسەبىندە جاريالانعان ستاتيستيكا 52 يۋريسديكتسياداعى ورتالىق بانكتەر مەن باسقا ورگانداردىڭ قاتىسۋىمەن ءساۋىر ايىندا جاسالدى.

قىتاي حالىق بانكىنىڭ (ورتالىق بانك) مالىمەتىنشە، 2020 -جىلمەن سالىستىرعاندا يۋانمەن ترانسشەكارالىق ەسەپ ايىرىسۋ كولەمى وتكەن جىلى % 29- عا ءوسىپ، 36,61 تريلليون يۋانعا (5,12 تريلليون دوللار) جەتتى.

جەرگىلىكتى ب ا ق حابارلاۋىنشا، قىتايدىڭ «جىبەك جولى ينۆەستيتسيالىق قورى» شىلدە ايىندا يندونەزيانىڭ ۇلتتىق ءال- اۋقات قورىنا 20 ميلليارد يۋانعا دەيىن ينۆەستيتسيا سالۋ تۋرالى ينۆەستيتسيالىق كەلىسىمگە قول قويدى. ينۆەستيتسيا تولەمنىڭ قولايلى ءتۇرى رەتىندە يۋاندى پايدالانادى.

قىركۇيەك ايىندا رەسەيلىك «گازپروم» مەن قىتايدىڭ China National Petroleum Corp قىتايعا تابيعي گاز جەتكىزگەنى ءۇشىن تولەمدەردى رۋبل جانە يۋانمەن اۋدارۋ تۋرالى كەلىسىمگە قول قويدى.

سوڭعى كەزدە ورتالىق ازيادا يۋاندى قولدانۋدىڭ ايتارلىقتاي وسكەنى بايقالادى. قىركۇيەك ايىندا قازاقستان رەسپۋبليكاسىنىڭ ۇلتتىق بانكى مەن قىتاي حالىق رەسپۋبليكاسىنىڭ حالىق بانكى قازاقستاندا يۋانمەن وپەراتسيالار جۇرگىزۋ ءۇشىن كليرينگتىك ەسەپ ايىرىسۋلاردى قۇرۋ ماقساتىندا ىنتىماقتاستىق تۋرالى مەموراندۋمعا قول قويدى.

رۋسلان سۇلەيمەنوۆ

فوتو: thelawyer.com

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى