ءۇي قىزمەتشىسىنىڭ اڭگىمەسى: بايلار شىندىعىندا قالاي ءومىر سۇرەدى؟
دەگەنمەن، ولار ءبارىن ەستيدى جانە ءبارىن كورەدى. سوندىقتان ولار جۇمىس بەرۋشىلەرىنىڭ ءومىرىن جاقىن تۋىستارىنان دا جاقسىراق بىلەدى.
2010-جىلدىڭ جازىندا ستەفاني لەند ءوزىنىڭ جاڭا جۇمىس بەرۋشىسىن جولىقتىرادى، ونى كەيىن «تەمەكىلى بيكەش» دەپ اتاپ كەتەدى.
ول كەزدە جازۋشى بولۋدى ارماندايتىن تالانتتى قىز قيىن كەزەڭدەردى باستان وتكەرىپ جاتقان ەدى. 20 جاسىندا ول جالعىزباستى انا اتاندى جانە كۇنكورىس ءۇشىن ۆاشينگتون شتاتىندا ءۇي قىزمەتشىسى بولىپ جۇمىسقا تۇرادى. ونىڭ مىندەتىنە امەريكالىق ەليتانىڭ ءساندى ۇيلەرىندەگى اس ۇيلەر مەن جۋىناتىن بولمەلەردى بىرنەشە ساعات بويى تازالاۋ كىردى.
ول جۇمىس بەرۋشىلەرىمەن ەشقاشان سويلەسپەيتىن. ولاردىڭ كوپشىلىگى مۇنى ەسىنە دە المايتىن شىعار. ءبىراق ستەفاني بۇل ادامدار تۋرالى كوپ نارسە بىلەدى، ءتىپتى ءوزى قالاعاننان دا كوپ. ول العاشقى مەديتسينالىق كومەككە ارنالعان قوبديشالاردى سۇرىپتاپ، فوتوسۋرەتتەر سورەلەرىندەگى شاڭدى ءسۇرتىپ، بىرتە-بىرتە وتكەن قايعىلى وقيعالارعا، قارجىلىق قيىندىقتارعا جانە وتباسىلىق قۇپيالارعا ۇڭىلە ءتۇستى.
ول سول دەتالدارعا قاراي وتىرىپ، بايلاردىڭ ءومىرىن ويدان قۇراستىراتىن: «بۇل ءوزىمدى جالعىز سەزىنەتىن قىزىقسىز جۇمىستا كوڭىل كوتەرۋدىڭ ءبىر جولى بولدى»، - دەيدى ول.
ءسويتىپ ءجۇرىپ ستەفاني ءوزى جۇمىس ىستەيتىن ءزاۋلىم ۇيلەر مەن ولاردا تۇراتىن ادامدارعا لاقاپ اتتار ويلاپ تاپتى - «مۇڭدى ءۇي»، «فەرمەرلەر مەكەنى»، «شەف اسپاز ءۇيى». ءبىراق ونى ماگنات كۇيەۋىمەن گولف الاڭىنىڭ جانىنداعى سارايدا تۇراتىن ورتا جاستاعى ءۇي شارۋاسىنداعى ايەلدەن باسقا ەشكىم باۋراپ الا المادى. بۇل ايەلدىڭ ومىرىندە ءبارى تاماشا بولاتىن. ءتىپتى شاشى مەن ماكياجىنىڭ ءوزى سۇلۋلىق سالونىنان 5 مينۋت بۇرىن شىققانداي كورىنەتىن. كەيىن ول ءمىنسىز ايەلدىڭ وسال تۇستارىن انىقتاي باستايدى...
وسى سەكىلدى بارلىق جۇمىس بەرۋشىلەرى تۋرالى اڭگىمەلەر جازا باستايدى.
2019-جىلى جاريالانعان ستەفاني لەندتىڭ مەمۋارلارى بەستسەللەرگە اينالادى.
ستەفانيدىڭ كىتابىنا 10 عا جۋىق پروديۋسەرلىك كومپانيا قىزىعۋشىلىق تانىتتى. سوڭىندا Netflix فيلمدى ەكرانيزاتسيالاۋ قۇقىعىن ساتىپ الدى، ال 2021-جىلدىڭ كۇزىندە ستريمينگتىك پلاتفورمادا «ءۇي تازالاۋشى. جالعىزباستى انانىڭ وقيعاسى» اتالاتىن سەريال شىقتى. ستەفاني لەندتىڭ ومىرىنە نەگىزدەلگەن جالعىز باستى انانىڭ حيكاياسى. ونداعى باستى ءرولدى اتاعى شارىقتاپ كەلە جاتقان مارگارەت كۋەللي وينادى.
وندا الا تاڭنان قارا كەشكە دەيىن بايلاردىڭ ءۇيىن جيناعان قىزدىڭ ەليتا ومىرىنە قاتىستى اشىق ويلارى ايتىلادى. قاراپايىم حالىق ءۇشىن بۇل شىنىمەن كۇتپەگەن جايت بولدى. ءتىپتى سول بايلاردىڭ وزدەرى ءۇشىن دە.
