قازاقستان مەن وزبەكستان سەناتورلارى ارال ماسەلەسىن تالقىلادى
كوميسسيانىڭ جۇمىسىن اشا وتىرىپ، ماۋلەن اشىمبايەۆ قازىرگى كەزەڭدە قازاقستان مەن وزبەكستان اراسىنداعى سىندارلى جانە سەنىمدى ديالوگ قۇرعانىن اتاپ ءوتتى.
«بۇگىندە ءبىزدىڭ كوشباسشىلارىمىز ىنتىماقتاستىق پەن ءوزارا ءىس-قيمىلدىڭ ۇلگىسىن كورسەتىپ وتىر. قازاقستان پرەزيدەنتى قاسىم-جومارت توقايەۆ مەملەكەت باسشىسى رەتىندەگى العاشقى ساپارىن باۋىرلاس وزبەكستانعا جاسادى. سونىمەن قاتار، وزبەكستان رەسپۋبليكاسىنىڭ پرەزيدەنتى شاۆكات ميرزيەيەۆتىڭ 2021-جىلعى جەلتوقسانداعى مەملەكەتتىك ساپارىنىڭ قورىتىندىسى بويىنشا ءبىزدىڭ ارىپتەستىگىمىز وداقتاس قاتىناس دەڭگەيىنە كوتەرىلدى. ءبىزدىڭ پالاتالار اراسىنداعى ىنتىماقتاستىق جونىندەگى كوميسسيا بەلسەندى جۇمىس ىستەپ جاتىر. كوميسسيانىڭ ەكى تەڭ ءتوراعاسىنىڭ بەلسەندى جۇمىسىن اتاپ وتكىم كەلەدى»، - دەدى ماۋلەن اشىمبايەۆ.
سەناتورلاردىڭ تالقىلايتىن نەگىزگى ماسەلەلەردىڭ ءبىرى - ارال تەڭىزى اپاتىنىڭ سالدارىن جويۋ بويىنشا ءوزارا ءىس-قيمىل پەرسپەكتيۆالارى.
«ارالدىڭ قۇرعاۋىن ب ۇ ۇ جانە بۇكىل الەمدىك قوعامداستىق قازىرگى زاماننىڭ جاھاندىق ەكولوگيالىق پروبلەمالارىنىڭ ءبىرى دەپ تانىدى. قازاقستان مەن وزبەكستان ارال وڭىرىندەگى جاعدايدى ەداۋىر دارەجەدە تۇراقتاندىرۋعا مۇمكىندىك بەرەتىن ءتيىستى شارالاردى جانە جوبالاردى ىسكە اسىرىپ جاتىر. بۇگىن كوميسسيا وتىرىسىندا ءبىزدىڭ دەپۋتات ارىپتەستەرىمىز وسى وتكىر ەكولوگيالىق پروبلەمانى شەشۋ ءۇشىن پارلامەنتتەر تاراپىنان بىرلەسكەن جۇمىس بويىنشا ودان ءارى ۇسىنىستار مەن يدەيالار كوتەرەتىنىنە سەنىمدىمىن»، - دەدى ماۋلەن اشىمبايەۆ.
سونداي-اق، وتىرىس بارىسىندا سەناتورلار ءوڭىرارالىق جانە شەكارا ماڭى ىنتىماقتاستىعىن دامىتۋ، سونداي-اق ەكى ەل قالالارىنىڭ بايلانىسىن نىعايتۋ ماسەلەلەرىن تالقىلادى.
