ۇلىتاۋ وبلىسىنا عارىش كەمەسىنىڭ بولشەگى قۇلاۋىنا بايلانىستى ادامدار ەۆاكۋاتسيالاندى
ۇلىتاۋ وبلىسى جاڭاارقا اۋدانىنىڭ تۇرعىندارى ورىنباي اۋىلىنىڭ ماڭىندا عارىش كەمەسىنىڭ فراگمەنتى قۇلاعان ءساتتى ۆيدەوعا ءتۇسىرىپ العان. بۇل بەينەجازبا الەۋمەتتىك جەلىلەردە تاراپ، ادامدار اراسىندا جەرگىلىكتى تۇرعىنداردىڭ دەنساۋلىعىنا زيان كەلۋى مۇمكىن دەگەن الاڭداۋشىلىق تۋىندادى. الايدا، جاڭاارقا اۋدانىنىڭ اكىمدىگى بۇل بولشەك قاۋىپتى ەمەس جانە زيانسىز دەپ سەندىرەدى.
«بۇل جەرگە تۇسكەن بولشەك - «پروگرەسس مس 21» جۇك تاسىمالداۋشى عارىش كەمەسىنىڭ قالدىعى. ورىنباي ەلدى مەكەنىنەن 25 شاقىرىم جەرگە تۇسكەن. كوسموس كەمەسىنىڭ ۇشۋ كۇنى، ۋاقىتى جانە قالدىقتىڭ تۇسەتىن ورنى الدىن الا بەلگىلەنىپ، «روس كوسموس» ماماندارىنان ارنايى شۇعىل ارەكەت ەتۋ توپتارى قۇرىلىپ، كۇزەتكە الىنعان. قۇلاعان قالدىقتار عارىش كەمەسىنىڭ ءبىرىنشى ساتىسى، ياعني تۇرعىندارعا زياندى اسەرى جوق. قازىرگى ۋاقىتتا قالدىقتى تازالاپ، الىپ كەتۋ جۇمىستارى جۇرگىزىلىپ جاتىر. ارناۋلى تەحنيكا جانە ماماندار جۇمىلدىرىلىپ، باقىلاۋ كۇشەيتىلگەن»، - دەپ ءتۇسىندىردى جاڭاارقا اۋدانى اكىمدىگىنىڭ باسپا ءسوز قىزمەتى.
