سەناتتا قىسقى سپورت تۇرلەرىن دامىتۋ ماسەلەسى كوتەرىلدى
پارلامەنت دەپۋتاتى الماتى وبلىسىنداعى قىسقى سپورت تۇرلەرى بويىنشا سپورت ورتالىقتارى ءارى بالالار مەن جاس وسپىرىمدەرگە ارنالعان سپورت مەكتەپتەرىنىڭ ماتەريالدىق-تەحنيكالىق بازاسىنىڭ جانە دامۋ دەڭگەيىنىڭ تومەندىگىنە الاڭداۋشىلىق ءبىلدىردى.
«وڭىرلەردە قىسقى سپورت تۇرلەرىنە ارنالعان جابىق سپورتتىق كەشەندەر از. ولاردىڭ كوبى تەك استانا مەن الماتى قالالارىندا ورنالاسقان. سوندىقتان بۇل ماسەلەنى تەز ارادا قولعا الىپ، بارلىق وڭىردە، سونىڭ ىشىندە جەتىسۋ وبلىسىندا قىسقى سپورت تۇرلەرىنەن جابىق سپورتتىق كەشەندەردى بارىنشا كوبەيتۋ كەرەك دەپ ويلايمىز»، - دەدى دەپۋتات سەناتتىڭ جالپى وتىرىسىندا.
سەناتور وڭىردە ءتيىستى سپورت عيماراتتارىن سالۋدى، دارىندى سپورتشى بالالارعا ارنالعان لەپسى اۋىلىنداعى مەكتەپ-ينتەرناتىنىڭ ماتەريالدىق-تەحنيكالىق بازاسىن جاڭعىرتۋدى، سونداي-اق تالدىقورعان جانە تەكەلى قالالارىندا، اقسۋ اۋدانىنىڭ قاپال اۋىلىندا قىسقى سپورت تۇرلەرى بويىنشا ارناۋلى جانە بالالار مەن جاس وسپىرىمدەرگە ارنالعان سپورت مەكتەپتەرىن اشۋدى ۇسىندى. سونىمەن قاتار سەناتور وبلىستاعى ەسكەلدى اۋدانىندا ب ج س م جانىنان شاڭعى ءبولىمىن اشۋدىڭ جانە وبلىس ورتالىعىندا مۇز سارايىن سالۋدىڭ ماڭىزدىلىعىنا نازار اۋداردى.
