قاسىم-جومارت توقايەۆ پەن شارل ميشەل ساياسي ديالوگ قارقىنىن كۇشەيتۋگە ۋاعدالاستى
بۇل تۋرالى بۇگىن اقوردادا ەۋروپالىق كەڭەستىڭ پرەزيدەنتى شارل ميشەلمەن كەلىسسوزدەردەن كەيىنگى باسپا سوزگە ارنالعان مالىمدەمە بارىسىندا ق ر پرەزيدەنتى قاسىم-جومارت توقايەۆ ايتتى، دەپ حابارلايدى قازاقپارات ءتىلشىسى.
«بۇگىن ەۋروپالىق كەڭەس پرەزيدەنتى شارل ميشەل قازاقستانعا العاشقى رەسمي ساپارمەن كەلىپ وتىر. بۇل - ءبىز ءۇشىن ۇلكەن مارتەبە. وسى رەتتە مەنىڭ شاقىرۋىمدى قابىل العانى ءۇشىن قۇرمەتتى قوناعىمىزعا شىنايى ريزاشىلىعىمدى بىلدىرەمىن. كەلەسى جىلى قازاقستان مەن ەۋروپالىق وداق اراسىندا ديپلوماتيالىق قاتىناس ورناعانىنا 30 جىل تولادى. سوندىقتان شارل ميشەل مىرزانىڭ ساپارى وسى مەرەيلى مەجە قارساڭىندا ءوتىپ وتىرعانى ەرەكشە قۋانتادى. ءبىز بۇل ساپارعا ايرىقشا ءمان بەرەمىز»، - دەدى مەملەكەت باسشىسى.
قاسىم-جومارت توقايەۆ پرەزيدەنت ميشەلدىڭ قازاقستان مەن ەۋروپالىق وداق اراسىنداعى ىنتىماقتاستىقتى نىعايتۋعا قوسىپ وتىرعان سۇبەلى ۇلەسىن جوعارى باعالايتىنىن ايتتى.
«ءبىز ەكىجاقتى ىقپالداستىعىمىزدى جاڭا ساپالى دەڭگەيگە كوتەرۋ ءۇشىن كەڭ اۋقىمدى ءارى مازمۇندى كەلىسسوزدەر جۇرگىزدىك. كەزدەسۋىمىز ءوزارا سەنىم جانە تۇسىنىستىك رۋحىندا ءوتتى.
ءبىز مازمۇندى ساياسي ديالوگتىڭ قارقىنىن ودان ءارى كۇشەيتەمىز دەپ ۋاعدالاستىق. سونداي-اق كەڭەيتىلگەن سەرىكتەستىك جانە ىنتىماقتاستىق تۋرالى كەلىسىم اياسىنداعى ستراتەگيالىق ارىپتەستىگىمىزدى نىعايتۋعا نيەتتى ەكەنىمىزدى راستادىق»، - دەدى ق ر پرەزيدەنتى.
