ءماسىموۆتىڭ قاماۋ مەرزىمى تاعى ۇزارتىلدى
بۇل تۋرالى Tengrinews.kz ۇ ق ك باسپا ءسوز قىزمەتىنە سىلتەمە جاساپ حابارلادى.
رەسمي مالىمەت بويىنشا، تەرگەۋ سوتى ءماسىموۆ پەن سادىقۇلوۆتى قاماۋعا الۋ مەرزىمىن 2022 -جىلدىڭ 6-جەلتوقسانىنا دەيىن ۇزارتقان.
«د. ە. ەرعوجيندى قاماۋدا ۇستاۋ مەرزىمى 2022-جىل 13-جەلتوقسانعا دەيىن، م. س. وسيپوۆا - 2022-جىل 12-جەلتوقسانعا دەيىن ۇزارتىلدى. د. م. اكيپوۆ پەن ن. ك. بەكمۇراتقا ەشقايدا كەتپەۋ تۋرالى جازباشا مىندەتتەمە تۇرىندەگى بۇلتارتپاۋ شاراسى قولدانىلدى»، - دەپ حابارلادى ۇلتتىق قاۋىپسىزدىك كوميتەتىنىڭ باسپا ءسوز قىزمەتى.
ەسكە سالايىق، ۇلتتىق قاۋىپسىزدىك كوميتەتىنىڭ بۇرىنعى ءتوراعاسى كارىم ماسىموۆكە قاتىستى وسى جىلدىڭ 6-قاڭتارىندا ۇ ق ك قازاقستان رەسپۋبليكاسى قىلمىستىق كودەكسىنىڭ 175-بابى 1-بولىگىمەن مەملەكەتكە ساتقىندىق دەرەگى بويىنشا سوتقا دەيىنگى تەرگەۋ باستالدى. بيىل ناۋرىزدا باس پروكۋرور بەرىك اسىلوۆ ۇلتتىق قاۋىپسىزدىك كوميتەتىنىڭ بۇرىنعى ءتوراعاسى مەن ونىڭ ءۇش ورىنباسارىنا، ەكى بولىمشە باستىعىنا قاتىستى بىرنەشە ءىس قوزعالىپ، تەرگەلىپ جاتقانىن ايتتى.
