كاتار فۋتبولدان الەم چەمپيوناتىن وتكىزۋ ءۇشىن جۇزدەگەن ميلليارد دوللار جۇمسادى
كاتار باسشىسىنىڭ پىكىرىنشە، كەيبىر ايتىلعان سىندار جالا جابۋمەن تەڭ بولدى، دەپ حابارلايدى قازاقپارات AlJazeera-عا سىلتەمە جاساپ.
2010 -جىلى FIFA حالىقارالىق فۋتبول فەدەراتسياسى كاتارعا 2022 -جىلعى الەم چەمپيوناتىن وتكىزۋ قۇقىعىن بەردى، سودان بەرى ۇيىمداستىرۋشىلار بيىلعى 20- قاراشادا باستالاتىن تۋرنيرگە دايىندالۋ ءۇشىن جۇزدەگەن ميلليارد دوللار جۇمساعان.
«ءبىز الەم چەمپيوناتىن وتكىزۋ قۇرمەتىن جەڭىپ العاننان بەرى كاتار ەشبىر قابىلداۋشى ەل باسىنان وتكەرىپ كورمەگەن سىنعا ۇشىرادى»، - دەدى شەيح تاميم.
«العاشقىدا ءبىز بۇل سىنداردى دۇرىس قابىلداپ، ءتىپتى كەيبىرىن وڭ جانە پايدالى دەپ سانادىق، بۇل بىزگە دامۋدى قاجەت ەتەتىن باعىتتاردى قالىپتاستىرۋعا كومەكتەستى»، - دەدى ول. «ءبىراق كوپ ۇزاماي بىزگە بۇل سىناۋ ناۋقانىنىڭ ۇزاققا جالعاسىپ، ءورشىپ، بۇرمالاۋشىلىققا ۇلاسىپ بارا جاتقانى بايقالدى. بۇل وكىنىشكە وراي كوپشىلىكتى وسى ناۋقاننىڭ ناقتى سەبەپتەرى تۋرالى ويلاۋعا ءماجبۇر ەتتى»، - دەپ قوستى كاتار كوشباسشىسى.
سوڭعى جىلدارى ادام قۇقىقتارىن قورعاۋ ۇيىمدارى الەم چەمپيوناتىنىڭ ستاديوندارىن سالىپ جاتقان ەڭبەك ميگرانتتارىنىڭ قياناتقا ۇشىراۋى تۋرالى كوپ حابارلاعان. مامىر ايىندا Human Rights Watch جانە Amnesty International باسقا سەگىز ۇيىممەن بىرگە دج. ينفانتينوعا حات جولداپ، FIFA مەن كاتاردى الەم چەمپيوناتىنا دايىندىق كەزىندە قازا تاپقان جۇمىسشىلاردىڭ وتباسىلارىنا وتەماقى تولەۋگە شاقىردى. «ءبىز بۇل سىناقتى ءوز الەۋەتىمىزگە، ياعني كاتارلىقتار، قيىندىققا توتەپ بەرىپ، تابىسقا جەتۋگە سەنگەندىكتەن قابىلدادىق»، - دەدى ول. الەم چەمپيوناتى كەزىندە كاتارعا 1,2 ميلليون ادام كەلەدى دەپ بولجانىپ وتىر.
FIFA پرەزيدەنتى دجانني ينفانتينو تاياۋ شىعىستا العاش رەت وتەتىن الداعى الەم چەمپيوناتى «تاريحتاعى بۇرىن بولماعان» چەمپيونات بولاتىنىن ايتتى. 2020 -جىلدىڭ تامىزىندا كاتار ءوزىنىڭ ەڭبەك زاڭناماسىنا ماڭىزدى وزگەرىستەر ەنگىزەتىنىن جاريالادى. بۇل وزگەرىستەر قاتارىندا جۇمىسشىلاردى ىستىقتان قورعاۋ ەرەجەلەرى مەن ەڭ تومەنگى ايلىق جالاقى 1000 ريال (129000 تەڭگە) بولدى.
فوتو: AlJazeera
اۆتور
سماعۇلوۆا ەركەجان
