قازاقستاننىڭ تۇراقتى وكىلى د س ۇ باس ديرەكتورىنا سەنىم گراموتالارىن تاپسىردى
ق ر سىرتقى ىستەر مينيسترلىگىنىڭ مالىمەتىنشە، كەزدەسۋ بارىسىندا ن. وكوندجو-يۆەالا قازاقستان پرەزيدەنتى قاسىم-جومارت توقايەۆقا د س ۇ جانىنان قازاقستاننىڭ تۇراقتى وكىلدىگىن اشۋ تۋرالى شەشىم قابىلداعانى ءۇشىن العىس ءبىلدىردى. باس ديرەكتوردىڭ پىكىرىنشە، بۇل ەلىمىزدىڭ 2022-جىلعى ماۋسىمدا قازاقستاننىڭ توراعالىعىمەن ءساتتى اياقتالعان د س ۇ- نىڭ 12-مينيسترلىك كونفەرەنسياسى بارىسىندا قول جەتكىزىلگەن ۋاعدالاستىقتار يمپلەمەنتاتسياسىنا ەلەۋلى ۇلەس قوسۋعا ىقپال ەتەدى.
ءوز كەزەگىندە قازاقستاننىڭ تۇراقتى وكىلى 2015-جىلى د س ۇ- عا كىرگەن ساتتەن باستاپ، قازاقستان كوپجاقتى ساۋدا جۇيەسىن بەلسەندى تۇردە قولدايتىنىن اتاپ ءوتتى. بۇعان دەيىن قازاقستان دسۇ- نىڭ ساۋدا جانە قورشاعان ورتا جونىندەگى كوميتەتىنىڭ جۇمىسىنا ءتوراعالىق ەتكەن، 2018-جىلدان باستاپ ەلىمىز دسۇ- نىڭ قىزمەتتەر ساۋداسى جونىندەگى ارنايى سەسسياسىن باسقارىپ كەلەدى. قازاقستاننىڭ، سونداي-اق ورتالىق ازيا ەلدەرىنىڭ ۇيىمعا كىرۋىنە جاردەم كورسەتەتىنى جانە تەڭىزگە شىعا المايتىن دامۋشى ەلدەردىڭ مۇددەلەرىن بىلدىرەتىنى اتاپ ءوتىلدى.
