رەسپۋبليكا كۇنى: تۇركياداعى قازاقتار ۇلتتىق مەرەكەنى كەمەدە اتاپ ءوتتى
بۇل تۋرالى قازاقپارات ءتىلشىسى ق ر سىرتقى ىستەر مينيسترلىگىنىڭ باسپا ءسوز قىزمەتىنە سىلتەمە جاساپ حابارلايدى.
«مەرەكەلىك ءىس-شارا الەمنىڭ ەڭ كوركەم جەرلەرىنىڭ ءبىرى سانالاتىن بوسفور بۇعازىندا ءوتتى. وعان ىستانبۇل، بۋرسا، يزمير جانە ساكاريا سياقتى قالالاردا تۇراتىن بەلسەندى ازاماتتارىمىز بەن ستۋدەنتتەر قاتىستى.
«ۆاليدە سۇلتان» كەمەسىندە وتكەن سالتاناتتى شارا مەملەكەتتىك انۇرانمەن باستالىپ، جاستاردىڭ كونسەرتتىك باعدارلاماسى جانە زياتكەرلىك ويىندارىمەن جالعاسىن تاپتى. كەمەنىڭ جان-جاعى كوك بايراقتارىمىزبەن بەزەندىرىلدى. بۇل - تۇركيانىڭ ءبىزدىڭ ۇلتتىق مەرەكەگە دەگەن ەرەكشە قۇرمەتى»، - دەلىنگەن مينيسترلىكتىڭ حابارلاماسىندا.
ۆەدومستۆو اقپاراتىنا قاراعاندا، شارا سوڭىندا باس كونسۋلدىقتىڭ جۇمىستارىنا اتسالىسقان ازاماتتار مەن قازاقستاندىق ستۋدەنتتەر العىس حاتتارمەن ماراپاتتالىپ، ارنايى سىيلىقتار تابىستالدى.
