قونايەۆتا قازاقتىڭ ءۇش تاريحي تۇلعاسىنا مەموريالدىق ەسكەرتكىش ورناتىلدى

ايتا كەتەيىك، بيىل اتالعان ستانتسيانىڭ بوي كوتەرۋىنە ەلەۋلى ۇلەس قوسقان تاريحي تۇلعالار دىنمۇحامەد قونايەۆ پەن شاپىق شوكيننىڭ تۋعانىنا 110 جىل تولىپ وتىر. وسى مەرەيلى داتانى اتاپ ءوتۋ ماقساتىندا ولاردىڭ قۇرمەتىنە قونايەۆ قالاسىندا مەموريالدىق ەسكەرتكىش قويىلدى.

«بيىل دىنمۇحامەد احمەت ۇلىنىڭ 110 جىلدىعىمەن قاتار، قاپشاعاي سۋ ەلەكتر ستانتسياسى جوباسىنىڭ اۆتورى، شاپىق شوكيننىڭ 110 جىلدىعى جانە كورنەكتى مەملەكەت قايراتكەرى اسانباي اسقاروۆتىڭ 100 جىلدىعىمەن ەرەكشەلەنىپ وتىر. ءوڭىرىمىزدىڭ وركەندەۋىنە ولشەۋسىز ۇلەس قوسقان ءبىرتۋار ازاماتتاردىڭ ەڭبەكتەرىنە لايىقتى باعا بەرىلىپ، مەموريالدى ەسكەرتكىش اشىلدى. اتا- بابامىز اڭساعان ەگەمەندىگىمىز ەڭسەلى، بولاشاعىمىز باياندى بولسىن!»، - دەدى الماتى وبلىسىنىڭ اكىمى مارات سۇلتانعازيەۆ.

سالتاناتتى شارا بارىسىندا مەملەكەت جانە قوعام قايراتكەرى، دىنمۇحامەد قونايەۆتىڭ نەمەرەسى ەلدار قونايەۆ ەنەرگەتيكا سالاسىنىڭ ارداگەرى ەرلان قىرقىنبايەۆقا «قونايەۆتىڭ 110 جىلدىعى» مەرەكەلىك مەدالىن تابىس ەتتى.

«بۇل جەردىڭ تاريحى تەرەڭدە جاتىر. ايتا كەتسەك، شاپىق شوكين ىلە ارناسىن بوگەپ، اعىسى قاتتى وزەن بويىندا سۋ ەلەكتر ستانتسياسىن سالۋ كەرەكتىگىن ايتىپ، ۇلكەن جوبانى قورعاپ شىقتى. سودان كەيىن بۇل يدەيا سول كەزدەگى قازاقستاننىڭ باسشىسى دىنمۇحامەد قونايەۆقا ۇناپ، ستانتسيا قۇرىلىسى باستالىپ كەتتى. ال العاشقى ىرگەتاسى 1969 -جىلى قالانعانى بارىمىزگە بەلگىلى. ىلە وزەنى بويىندا سۋ ەلەكتر ستانتسياسى سالىنىپ قانا قويماي، قازىردە وبلىس ورتالىعىنا اينالعان قالا بوي كوتەردى»، - دەپ ستانسيانىڭ سالىنۋ تاريحىنا توقتالدى ەرلان قىرقىنبايەۆ.

ەسكە سالا كەتەيىك، بيىل الماتى وبلىسى بالقاش اۋدانىنىڭ باقاناس اۋىلىندا دىنمۇحامەد قونايەۆقا ەسكەرتكىش ورناتىلعان ەدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى