فەستيۆال قوناقتارى ون ۇزدىك قويىلىمدى تەگىن تاماشالايدى - فوتو

بۇل شارا كورنەكتى تەاتر جانە كينو رەجيسسەرى ءازىربايجان مامبەتوۆتىڭ 90 جىلدىعىنا ارنالعان، دەپ حابارلايدى قازاقپارات.

فەستيۆالدىڭ سالتاناتتى اشىلۋ ءراسىمى ءا. مامبەتوۆ اتىنداعى مەملەكەتتىك دراما جانە كومەديا تەاترىنىڭ قابىرعاسىندا ءوتتى. وعان استانا قالاسىنىڭ اكىمى التاي كولگىنوۆ، قازاقستاننىڭ ەڭبەك ەرى، قازاقستاننىڭ حالىق ءارتىسى، قازاقستان مەملەكەتتىك سىيلىعىنىڭ لاۋرەاتى، قازاقستان تەاترلارى قاۋىمداستىعىنىڭ پرەزيدەنتى اسانالى ءاشىموۆ، قازاقستاننىڭ حالىق ءارتىسى، وپەرا ءانشىسى، پروفەسسور، حالىق قاھارمانى، تەاتر جانە كينو رەجيسسەرى ءازىربايجان مامبەتوۆتىڭ جارى قورلان قاليلامبەكوۆا، سول سياقتى اكتەرلەر ءادىل احمەتوۆ پەن تۇرسىنبەك قاباتوۆ، وزگە دە ەلوردالىق تەاترلاردىڭ ۇجىمدارى قاتىستى.

داستۇرگە سايكەس سپەكتاكل باستالار الدىندا فەستيۆالگە قاتىسۋشىلار قىزىل كىلەمنىڭ ۇستىنەن ءجۇرىپ ءوتتى. سول سياقتى مەرەكەلىك كەش بارىسىندا قازاقستاندىق تەاتر ونەرىنىڭ شەبەرى ءازىربايجان مامبەتوۆتىڭ شىعارماشىلىق مۇراسىنا ارنالعان بىرەگەي گولوگرامما-سيفرلىق كورمەسى ءوتتى. جوبا اۆتورى باۋىرجان باقتىگەرەيەۆ اررايى تاجىريبەلەردىڭ كومەگىمەن وسىنداي ناتيجەگە قول جەتكىزدى.

كورمەگە 30 عا جۋىق ەكسپونات قويىلدى. كومپوزيتسيا زاتتار ورنالاسقان كوپتەگەن بولىمدەردەن تۇرادى. مۇنىڭ ءبارى ارنايى بولىمدەرگە ورناتىلعان ەكرانداردىڭ استىندا ورنالاسقان.

تەاتر اپتالىعىنىڭ سالتاناتتى اشىلۋىندا كورەرمەن قاۋىمعا ق. قۋانىشبايەۆ اتىنداعى مەملەكەتتىك اكادەميالىق قازاق مۋزىكالىق-دراما تەاترىنىڭ «عاسىردان دا ۇزاق كۇن» سپەكتاكلى قويىلدى.

ءبىر اپتا ىشىندە فەستيۆال بىرنەشە تەاتردىڭ ساحناسىندا وتەدى. جالپى، فەستيۆال اياسىندا نيەت بىلدىرۋشىلەر 10 ۇزدىك وتاندىق جانە شەتەلدىك سپەكتاكلدەرگە تەگىن قاتىسا الادى.

فەستيۆالدىڭ جابىلۋ سالتاناتى 30-قازاندا وتەدى. سالتاناتتى ءراسىم كەزىندە «ۇزدىك قويىلىم»، «ۇزدىك ەر ادام ءرولى»، «ۇزدىك ايەل ءرولى»، «ەكىنشى پلانداعى ۇزدىك ايەل ءرولى»، «ەكىنشى پلانداعى ۇزدىك ەر ادام ءرولى»، «ۇزدىك سەنوگرافيا»، «ۇزدىك ەپيزودتىق ءرول» نوميناتسيالارى بويىنشا جەڭىمپازدارعا سىيلىقتار تابىستالادى. سونداي-اق، تەاتر ونەرىن دامىتۋعا قوسقان ۇلەسى ءۇشىن ءازىربايجان مامبەتوۆ اتىنداعى ارنايى سىيلىق تاعايىندالدى.

ەستەرىڭىزگە سالا كەتەيىك، استاناداعى تەاتر فەستيۆالى 30-قازانعا دەيىن جالعاسادى. وعان ەلىمىزدىڭ 8 تەاتر ۇجىمى جانە رەسەي، ازەربايجان، وزبەكستان، قىرعىزستان جانە تۇرىكمەنستان ەلدەرىنەن كەلگەن قۇرمەتتى قوناقتار - سانكت- پەتەربۋرگ كامەرالىق تەاترى، گەيدار اليەۆ اتىنداعى تبيليسي مەملەكەتتىك ازەربايجان تەاترى، وزبەك مەملەكەتتىك جيزاك مۋزىكالىق دراما تەاترى، ت. ابدۋمومۋنوۆ اتىنداعى قىرعىز مەملەكەتتىك اكادەميالىق دراما تەاترى، تۇرىكمەن ماحتۋمكۋلي اتىنداعى ۇلتتىق مۋزىكالىق دراما تەاترى قاتىسادى.

فەستيۆالدىڭ ارنايى قوناعى - گۋلاگ تاريحىنىڭ مەملەكەتتىك مۇراجايى (ماسكەۋ قالاسى).

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى