قازاق مادەنيەتىنىڭ ەلەمەنتتەرى باكۋدەگى قايىرىمدىلىق جارمەڭكەسىندە ۇسىنىلدى - فوتو
ءبىر شاڭىراق استىنداعى بىرەگەي بازار باكۋدە اككرەديتتەلگەن ونداعان ديپلوماتيالىق ۆەدومستۆولاردى جينادى.
ءىس-شاراعا ازەربايجان، قازاقستان، قىتاي، تۇركيا، ۋكراينا، سۋدان، تۇرىكمەنستان، مالايزيا، ساۋد ارابياسى، ەگيپەت جانە باسقا دا كوپتەگەن ەلدەر قاتىستى.
گەيدار الييەۆ اتىنداعى سپورت-كونسەرت كەشەنىندە جارمەڭكە قوناقتارىنا شەت ەلدەردىڭ ۇلتتىق تاعامدارى مەن كادەسىيلارىنىڭ كەڭ اسسورتيمەنتى ۇسىنىلدى.
كەلۋشىلەر تاۋارلاردى ەلشىلىكتەردەن سيمۆولدىق باعامەن ساتىپ الۋ مۇمكىندىگىنە يە بولدى، ال بارلىق تۇسكەن قاراجاتتى قايىرىمدىلىق ماقساتتا، اتاپ ايتقاندا مۇمكىندىگى شەكتەۋلى بالالاردىڭ قاجەتتىلىكتەرىنە جۇمساۋ جوسپارلانعان.
ءبىزدىڭ ەلشىلىگىمىزدىڭ كومەگىمەن ۇيىمداستىرىلعان قازاقستان پاۆيلونىندا ءداستۇرلى قازاق تاعامدارى قاتىسۋشىلار اراسىندا ۇلكەن قىزىعۋشىلىققا يە بولدى. ديپلوماتتار دايىنداعان وتاندىق ونىمدەر ساۋدانىڭ العاشقى ساعاتتارىندا ساتىلدى.
وتاندىق ستەندتە قازاق ۇلتتىق تاعامدارىنىڭ نەگىزگى قۇرامداس بولىگى بولىپ تابىلاتىن ەت، نان- توقاش جانە كونديتەرلىك ونىمدەر كوپشىلىككە ۇسىنىلدى. باۋىرساق، سامسا، مانتى، چاك- چاك، جەنت، قازى، شوكولاد جانە تاعى باسقالار ازەربايجاندا كەڭىنەن تانىمال تاعامدار ەكەنى جاسىرىن ەمەس.
شارا سوڭىندا لوتەرەيا ويناتىلىپ، كونسەرتتىك باعدارلاما ۇيىمداستىرىلدى.
قايىرىمدىلىق بازارىنىڭ قاتىسۋشىلارى مۇنداي اكسيالاردى وتكىزۋ باسقا ەلدەر مەن حالىقتاردىڭ مادەنيەتى مەن ءداستۇرىن جاقىنىراق بىلۋگە، بىرلىك پەن ءوزارا تۇسىنىستىك اتموسفەراسىن قۇرۋعا، ادامدارعا جىلۋلىق پەن جاقسىلىق اكەلەتىنىن اتاپ ءوتتى.
اكسيا ازەربايجان مەن ب ۇ ۇ اراسىنداعى سەرىكتەستىكتىڭ 30 جىلدىعىنا جانە ب ۇ ۇ كۇنىنە ارنالعان.
اۆتور
اقبوپە ءابدراسۋل
