باقىتگۇل حامەنوۆا تاعى دا تەرگەۋ يزولياتورىنان ءۇي قاماققا جىبەرىلمەدى

اتىراۋدا وبلىس اكىمىنىڭ بۇرىنعى ورىنباسارى باقىتگۇل حامەنوۆاعا قاتىستى سوت وتىرىسى قايتا جالعاستى.

سوت وتىرىسىندا ادۆوكات يگور ۆرانچيەۆ تەرگەۋ يزولياتورىندا وتىرعان باقىتگۇل حامەنوۆانىڭ بۇلتارتپاۋ شاراسىن ءۇي قاماققا نەمەسە ەشقايدا كەتپەۋ تۋرالى قولحاتپەن اۋىستىرۋدى سۇرادى.

«ادام بوستاندىقتا ءوزىن جاقسى سەزىنە مە، بىلمەيمىن. ءبىراق تۇرمەدە كۇتكەن ءار ساعات، ءار ءسات - ادامنىڭ تاعدىرى. سوندىقتان، مەن ادۆوكاتىمنىڭ دالەلدەرىمەن كەلىسەمىن»، - دەدى باقىتگۇل حامەنوۆا.

الايدا، پروكۋروراتۋرا وكىلى باقىتگۇل حامەنوۆاعا قاتىستى ءىس اۋىر قۇقىق بۇزۋشىلىق رەتىندە سارالانعاندىقتان، بۇل ءوتىنىشتى قاناعاتتاندىرۋدان باس تارتۋدى سۇرادى. سوت باقىتگۇل حامەنوۆاعا تاعىلعان ايىپتىڭ اۋىرلىعىن ەسكەرىپ، ادۆوكاتتىڭ ءوتىنىشىن قاناعاتتاندىرعان جوق.

وبلىستىق سوتتىڭ باسپا ءسوز قىزمەتىنىڭ مالىمەتىنشە، بيىلعى 26- مامىردا اتىراۋ قالاسىنىڭ 2№ سوتىنا ق ر قىلمىستىق كودەكسى 366-بابىنىڭ 3-بولىگى 2-تارماعىمەن اتىراۋ وبلىسى اكىمىنىڭ ورىنباسارى باقىتگۇل حامەنوۆاعا، اتىراۋ وبلىسى مادەنيەت، تىلدەردى دامىتۋ جانە ارحيۆ ءىسى باسقارماسىنىڭ باسشىسى اقىلبەك رىسقاليەۆكە، ق ر قىلمىستىق كودەسى 367-بابىنىڭ 2-بولىگىمەن «ب» ج ش س ديرەكتورىنا قاتىستى قىلمىستىق ءىس ءتۇستى.

باقىتگۇل حامەنوۆا بىلتىرعى جەلتوقساننان بەرى تەرگەۋ يزولياتورىندا وتىر. وعان قاتىستى سوت وتىرىسى 11- تامىزدا باستالدى.

قازىر ونىڭ ءىسى اتىراۋداعى 2№ قالالىق سوتتا قارالىپ جاتىر. ايىپتاۋ اكتىسى 55 بەتتەن تۇرادى.

بۇعان دەيىن باقىتگۇل حامەنوۆا وزىنە تاعىلعان ايىپتى مويىنداعان جوق. ول بيىلعى تامىزدا وبلىس اكىمىنىڭ ورىنباسارى قىزمەتىنەن بوساتىلدى.

سوت وتىرىسى 6- قىركۇيەكتە قايتا جالعاسىپ، باقىتگۇل حامەنوۆا قاتەلىك جىبەرگەنىن ايتتى.

بۇدان بۇرىنعى سوت وتىرىسىندا باسقارما باسشىسى وعان جالا جاپقانى تۋرالى ايتقانىن حابارلاعان ەدىك.

ەندى سوت وتىرىسى 27- قازاندا جالعاسادى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى