اتا- اجەنى باقىتقا بولەۋ ءۇشىن
قارتىن جىلاتپاعان قازاق ءۇشىن اتا- اجەنىڭ ورنى بولەك. اتا- اجەنى باقىتقا بولەۋ ءۇشىن دە جۇمىستانۋ كەرەك.
1. تىڭداڭىز ەگەر جانىڭىزداعى قارت ادام ءبىر نارسەنى مىڭ رەت قايتالاسا دا رەنجىمەڭىز. قارتتىق دەگەن قىزىق. جاسى كەلگەن ادامدار ءبىر اپتا بۇرىن نە بولعانىن ۇمىتىپ قالۋى مۇمكىن، ءبىراق، ستۋدەنتتىك شاقتارىن ۇمىتپايدى.
2. جاڭا نارسەگە ۇيرەتىڭىز مىسالى، سەلفي جاساۋ. ۆيدەو ارقىلى بايلانىس ورناتۋدى دا كورسەتىڭىز. ءسىز جىراققا كەتكەن شاقتا، اتا- اجەڭىزبەن وسىلايشا حابارلاسىپ تۇراسىز. ارينە، زامان كوشىنەن قالماۋ، جاڭا ءبىر نارسەنى ۇيرەنۋ - ولار ءۇشىن ۇلكەن قۋانىش.
3. سويلەسىڭىز ءوزىڭىزدىڭ كۇندەلىكتى ءومىرىڭىز تۋرالى ايتىڭىز. كىمدەردى كەزدەستىردىڭىز، كىمدەرمەن سويلەستىڭىز وسىنىڭ ءبارىن اتا- اجەڭىزگە ايتىپ، ولارمەن دوسىڭىزداي سىرلاسىڭىز. قارتايعان سايىن ولاردىڭ بويىن جالعىز قالامىن- اۋ دەگەن قورقىنىش بيلەپ الادى.
4. تۇرمىس جاعدايىنا قول ۇشىن سوزۋ اتا- اجەڭىز قارتتىقتىڭ كەلگەنىن مويىنداماۋ ءۇشىن، اۋىر زاتتاردى كوتەرىپ نەمەسە ءۇيدى وزدەرى جيناستىرىپ جۇرەدى. سول كەزدە ءسىز بىلدىرتپەي شاڭدى ءسۇرتىپ، كىلەمدى قاعىپ نەمەسە ىدىستى جۋىپ قويىڭىز. ۇلكەن ءىس ەمەس، ءبىراق، تيگىزەتىن پايداسى ءسىز ويلاعاننان دا كۇشتىرەك.
5. دەنساۋلىعىن كۇتىڭىز جانىمىزعا جاقىن جاندار اۋىرعانى تۋرالى ايتا بەرمەيدى. سىزدەردىڭ مازالارىڭىزدى الماسام دەگەن ويمەن ءومىر سۇرەدى. ءسىز اتا- اجەڭىزدىڭ جاعدايىن ءجيى سۇراپ تۇرىڭىز. ءدارىسىن اكەلىپ، ۋاقىتىلى مەديتسينالىق تەكسەرىستەن وتكىزۋدى ۇمىتپاڭىز. جاقىن جاندار قاسىمىزدا جۇرگەندە ءبىز ولاردىڭ جاعدايىنا ءمان بەرمەيمىز. ولار جانىمىزدا ماڭگى بولاتىنداي ءومىر سۇرەمىز. ءبىراق، ۋاقىت - الدامشى. بۇگىن بار، ەرتەڭ جوق. سوندىقتان، اتا- اجەڭىز، اتا- اناڭىز بەن باۋىرلارىڭىزعا دەگەن سۇيىسپەنشىلىگىڭىزدى ءىس جۇزىندە كورسەتىڭىز.
