قاسىم-جومارت توقايەۆ رەسپۋبليكا كۇنىنىڭ باستى قۇندىلىعىن اتادى
«ۇلى اباي ايتقانداي، «اقىرىن ءجۇرىپ، انىق باسا» وتىرىپ، ەشقانداي دۇربەلەڭسىز تاۋەلسىزدىككە قول جەتكىزدىك. ەڭ باستىسى - ءبىز بابالار اڭساعان ازات ەلگە اينالدىق. الەم مويىنداعان، قۇرمەت تۇتقان مەملەكەت اتاندىق. مۇنىڭ بارلىعى - بۇكىل حالقىمىزدىڭ ورتاق ەڭبەگىنىڭ جەمىسى. رەسپۋبليكا كۇنىنىڭ باستى قۇندىلىعى - وسىندا»، - دەدى مەملەكەت باسشىسى.
سونداي-اق ق. توقايەۆ تۇڭعىش پرەزيدەنت نۇرسۇلتان نازاپربايەۆتىڭ ەلىمىز ەگەمەندىگىنە قوسقان ۇلەسى تۋرالى ايتتى.
« ءبىز ادىلەتتىلىك تۋرالى ايتساق، تۇڭعىش پرەزيدەنت نۇرسۇلتان نازاربايەۆتىڭ ەلىمىزدىڭ ەگەمەندىككە جەتۋىنە قوسقان ەلەۋلى ۇلەسى جونىندە ايتۋىمىز كەرەك. تۇپتەپ كەلگەندە، تاۋەلسىزدىككە قالاي قول جەتكىزىپ، باياندى ەتە العانىمىز ماڭىزدى. وكىنىشكە قاراي، بۇل كۇن ەلىمىزدە ءبىراز جىل ءوز دەڭگەيىندە اتاپ وتىلگەن جوق. ءبىراق، تاريحي ادىلدىك ورنادى»، - دەدى پرەزيدەنت.
«مەن ۇلىتاۋدا وتكەن القالى جيىندا رەسپۋبليكا كۇنىنە ۇلتتىق مەرەكە مارتەبەسىن قايتارۋدى ۇسىندىم. ونى قازاقستاننىڭ باستى مەيرامى رەتىندە اتاپ ءوتۋ تۋرالى باستاما كوتەردىم. بۇل باستاما حالىقتىڭ كەڭ قولداۋىنا يە بولىپ، ءتيىستى زاڭعا وزگەرىس ەنگىزىلدى.
بيىلدان باستاپ رەسپۋبليكا كۇنى - ۇلتتىق مەرەكە. ەندى بۇل مەيرامدى كۇللى ەل بولىپ جاڭا مازمۇندا اتاپ وتەتىن بولامىز. قايتا جاڭعىرعان رەسپۋبليكا كۇنى - بۇل حالقىمىزدىڭ رۋحىن كوتەرىپ، ەلدىگىمىزدى نىعايتا تۇسەتىن اسا ماڭىزدى تاريحي قادام. سوندىقتان، وسى مەرەيلى كۇن ازاماتتارىمىزدىڭ ءوزارا تۇسىنىستىگىن، تۇتاس ۇلتىمىزدىڭ ەركىن ومىرگە جانە دەربەس دامۋعا ۇمتىلىسىن پاش ەتەتىن مەرەكە بولماق»، - دەدى ق. توقايەۆ.
مەملەكەت باسشىسى اتاپ وتكەندەي، «رەسپۋبليكا» ءسوزى لاتىن تىلىندە «ورتاق ءىس» دەگەن ماعىنا بەرەدى. ال رەسپۋبليكا ءوز ىسىنە جاۋاپتى ازاماتتاردىڭ ورتاق ءىس-ارەكەتىنىڭ ارقاسىندا قۇرىلادى. ويتكەنى، ازاماتتار - مەملەكەتتىڭ ارقاۋى. ازاماتتارى بولماسا، مەملەكەت تە بولمايدى.
