جامبىل وبلىسىندا شەرحان مۇرتازانىڭ ادەبي-مەموريالدىق مۋزەي-ءۇيى اشىلدى - فوتو
شەرحان مۇرتازا جۋالى اۋدانى تالاپتى اۋىلىندا دۇنيەگە كەلگەن. تۋعان اۋىلىمەن بايلانىسىن ەشقاشان ۇزبەگەن. جازۋشى العاشقى شىعارمالارىن، ونىڭ ىشىندە ايگىلى «اي مەن ايشا» ءومىرباياندىق رومانىن تۋعان جەرى جۋالى اۋدانى مەن ونىڭ ەرەكشە تابيعاتىنا ارناعان.
ءوڭىر اكىمدىگىنىڭ مالىمەتىنە سايكەس، مۋزەيگە جازۋشىعا تيەسىلى تۇرمىستىق زاتتار، ونىڭ قۇجاتتارى، ديپلومدارى، ماراپاتتارى، مەدالدارى، وتباسىمەن جانە دوستارىمەن بىرگە تۇسكەن فوتوسۋرەتتەرى قويىلعان. حالىق جازۋشىسىنىڭ اۋىلداستارى، زيالى قاۋىم وكىلدەرى، عالىمدار، مەملەكەت جانە قوعام قايراتكەرلەرى شەرحان مۇرتازانىڭ كابينەتىن، كىتاپحاناسىن ءدال سول قالپىندا كورىپ، تاماشالادى.
عيماراتتىڭ ءۇشىنشى قاباتىندا بيليارد زالى بار. شەرحان مۇرتازا ءبىر كەزدەرى تەك قارىمدى قالامگەر عانا ەمەس، بيليارد ويىنىڭ شەبەرى رەتىندە دە ءوزىن كورسەتە بىلگەن.
سونداي-اق تالاپتى اۋىلىندا حالىق جازۋشىسىنىڭ 90 جىلدىعىنا ارنالعان سالتاناتتى شارا ءوتتى.
«شەرحان مۇرتازا شىندىقتىڭ شىراقشىسى بولا بىلگەن الىپ تۇلعا. قىزمەتىن باسپا رەداكتورلىعىنان باستاپ، ۇزاق جىلدار رەسپۋبليكالىق بۇقارالىق اقپارات قۇرالدارىنىڭ باسشىسى، پارلامەنت ءماجىلىسىنىڭ دەپۋتاتى رەتىندە قالامگەرلىك پەن قايراتكەرلىكتى قاتار الىپ ءجۇردى.
ونىڭ ەلگە بەرگەنى، ايتقانى، كورسەتكەن ۇلگىسى، سىلتەگەن جولى ۇشان- تەڭىز. كوزى تىرىسىندە باسپا ءسوزدىڭ ءباھادۇرى، قارا ءسوزدىڭ زەرگەرى، شىندىقتىڭ شىراقشىسى اتاندى»، - دەدى جامبىل وبلىسىنىڭ اكىمى نۇرجان نۇرجىگىتوۆ.
سونداي- اق، ق ر اقپارات جانە قوعامدىق دامۋ ءمينيسترى دارحان قىدىرالى، قازاقستاننىڭ ەرى مۇحتار شاحانوۆ، حالىق قاھارمانى باقىتجان ەرتايەۆ، اكادەميك، مەملەكەتتىك سىيلىقتىڭ لاۋرەاتى سابدەن ورازالى، «قازاقستان ءداۋىرى» گازەتىنىڭ باس رەداكتورى ساۋلە مەشىتباي قىزى دا ويلارىن ورتاعا سالىپ، جازۋشىنىڭ تۇلعالىق بولمىسى تۋرالى اڭگىمەلەدى.
شارا بارىسىندا جازۋشىلار اراسىنداعى «اقيقاتتىڭ اق تۋى» بايقاۋى مەن «شىننىڭ ءجۇزى - شەراعا» رەسپۋبليكالىق اقىندار ءمۇشايراسىنىڭ جەڭىمپازدارىن سالتاناتتى تۇردە ماراپاتتاۋ ءراسىمى ءوتتى.
ەسكە سالايىق، پرەزيدەنت قاسىم-جومارت توقايەۆ شەرحان مۇرتازانىڭ 90 جىلدىعىنا وراي تارازدا ءوتىپ جاتقان مەرەيتويلىق ءىس-شاراعا ارنايى قۇتتىقتاۋ حات جولداعان بولاتىن. كەشە تاراز قالاسىندا شەرحان مۇرتازاعا ارناپ ەسكەرتكىش قويىلعان ەدى.
