دەپۋتات زاڭناماعا مادەنيەت قىزمەتكەرىنىڭ مارتەبەسىن كوتەرۋگە قاتىستى تولىقتىرۋلار ۇسىندى
«مادەنيەت تۋرالى زاڭدا جەتىلدىرەتىن، تولىسپاي تۇرعان تۇستارى كوپ. بىرىنشىدەن، مادەنيەت قىزمەتكەرلەرىنىڭ قوعامداعى مارتەبەسىن كوتەرۋىمىز كەرەك. ۇستازداردىڭ، دارىگەرلەردىڭ مارتەبەسىن، الەۋمەتتىك جاعدايىن كوتەرىپ جاتىرمىز. وسىنداي جاناشىرلىق زاڭدىق تۇرعىدان، ۇكىمەت جاعىنان مادەنيەت سالاسىنىڭ قىزمەتكەرلەرىنە كەرەك بولىپ تۇر»، - دەدى امانجول ءالتاي ماجىلىستە «مادەنيەت تۋرالى» زاڭعا وزگەرىستەر ەنگىزۋدى تالقىلاۋ بارىسىندا.
وسى ورايدا ول ەلىمىزدە بۇل سالا ماماندارىنىڭ الەۋمەتتىك جاعدايى ەڭ از قورعالعانىن، جالاقىسى تومەن ەكەنىن ايتتى.
«مادەنيەت دەگەنىمىز - ول كۇردەلى ءارى كەشەندى ۇعىم. ءبىزدىڭ رۋحاني بولمىسىمىز، بىرنەشە ماڭىزدى سالانىڭ بارلىعى مادەنيەتكە كىرەدى. مادەنيەتىنە كوڭىل بولگەن ەل ەكونوميكادا دا، ساياساتتا دا، سونداي-اق باسقا سالالاردا دا ۇلكەن تابىستارعا جەتەتىنىن ۇمىتپايىق. ونەر جانە مادەنيەت مايتالماندارى سالاداعى شەشىلمەي جاتقان ءبىراز ماسەلەنى كوتەرىپ ءجۇر. مادەنيەت قىزمەتكەرىنىڭ جالاقىسى تومەن بولسا، باسپانا الا المايدى. سوندىقتان ءبىرىنشى كەزەكتە وسى سالا قىزمەتكەرلەرىنىڭ الەۋمەتتىك جاعدايىن دۇرىستاۋىمىز كەرەك»، - دەدى دەپۋتات.
ءوز كەزەگىندە ءماجىلىس دەپۋتاتى جۇلدىز سۇلەيمەنوۆ قازىرگى كەزدە سالاداعى ءۇش زاڭ جوباسى اياسىندا جۇمىستار جۇرگىزىلىپ جاتقانىن ايتتى.
«كەشە عانا كىتاپحانا ءىسىنىڭ جاڭا مازمۇنىنا قاتىستى زاڭ جوباسىن تالقىلادىق. ەكىنشى قۇجات كىتاپ نارىعىن رەتتەۋ باعىتىنا ارنالىپ وتىر. ال ءۇشىنشى زاڭ جوباسىنا توقتالساق، مۋزەي قىزمەتكەرلەرىنىڭ مارتەبەسى مەن مۋزەي ءىسى تۋرالى قۇجاتتى دايىندايمىز. ويتكەنى مۋزەي مەن كىتاپحانا سالالارى مادەنيەت تۋرالى ۇلكەن اۋقىمدى زاڭنىڭ ءبىر-ءبىر بولشەگى بولىپ تۇر. اتاپ ايتقاندا، يدەولوگياعا ناقتى نازار اۋدارىپ، سوعان قاراجات ءبولىپ، سالانىڭ مارتەبەسىنە ەكپىن قويۋ تۇرعىسىندا ناقتى باعدارلامالاردى انىقتاۋ كەرەك. وسى ماسەلەلەردى ەسكەرە وتىرىپ، ءبىز ءتيىستى جۇمىستى باستاپ جاتىرمىز»، - دەدى ج. سۇلەيمەنوۆا.
