رەسپۋبليكا كۇنىن وزىنە ءتان تويلاۋ ءداستۇرىن قالىپتاستىرۋ كەرەك - قوعام قايراتكەرى
بۇل تۋرالى سەناتتاعى «ۇلتتىق مۇددە» ديالوگ الاڭى وتىرىسىندا مەملەكەت جانە قوعام قايراتكەرى ءومىرزاق وزعانبايەۆ ايتتى، دەپ حابارلايدى قازاقپارات ءتىلشىسى.
«بيىل ماۋسىم ايىندا ۇلىتاۋدا وتكەن ۇلتتىق قۇرىلتايدا مەملەكەت باسشىسى قاسىم- جومارت توقايەۆ 25-قازانداعى رەسپۋبليكا كۇنىنە ۇلتتىق مەرەكە مارتەبەسىن قايتارۋدى ۇسىندى. بۇل ۇسىنىس ءبىراز جىلدان بەرى تويلانباي كەلگەن مەرەكەمىزبەن قايتا قاۋىشۋعا مۇمكىندىك بەردى. رەسپۋبليكا كۇنى - ەلدىڭ مەملەكەت قۇرۋ جولىنداعى تاريحي قادامىنىڭ سيمۆولى. اتاپ ايتقاندا، ۇلتتىق مەرەكە - رەسپۋبليكا كۇنىن 25 -قازاندا اتاپ ءوتۋ ەلگە ۇنايدى. وسى كۇنى تاۋەلسىزدىكتىڭ باستى قۇجاتى قازاقستاننىڭ ەگەمەندىگى تۋرالى دەكلاراتسيا (1990 -جىلى 25-قازاندا) قابىلداندى. بۇل مەرەكەنىڭ وزىنە ءتان تويلاۋ ءداستۇرى قالىپتاستىرعان ءجون»، - دەدى ءومىرزاق وزعانبايەۆ «ەگەمەندىك جانە قازاقستاننىڭ ساياسي- قۇقىقتىق ترانسفورماتسياسى» تاقىرىبىندا وتكەن جيىندا.
وسى ورايدا ول ۇلتتىق مەرەكەنى لايىقتى دەڭگەيدە اتاپ وتۋگە ءتيىستى ۆەدومستۆولار مەن ماماندار اتسالىسۋى كەرەك ەكەنىن اتاپ ءوتتى. بۇل كۇنى ەلدىڭ تۇلپارلارىن انىقتايتىن بايگەلەر، ءتۇرلى سپورت جارىستارى وتكىزىلۋى كەرەك.
«بۇل كەزدە ەگىن جينالىپ بىتەدى. حالىقتىڭ كوڭىل- كۇيىن كوتەرۋدە وسى مەرەكەمەن بايلانىستىرۋعا بولادى»، - دەدى ءو. وزعانبايەۆ.
بۇدان بۇرىن حابارلانعانداي، «ۇلتتىق مۇددە» ديالوگ الاڭى وتىرىسىندا سەنات ءتوراعاسى ماۋلەن اشىمبايەۆ 25-قازان ەلىمىز ءۇشىن ازاتتىققا ۇمتىلىس جولىندا تاعدىرشەشتى ناتيجەگە قول جەتكىزگەن كۇن رەتىندە قادىرلى ەكەنىن اتاپ ءوتتى.
ايتا كەتەيىك، بيىل مەملەكەت باسشىسى قاسىم- جومارت توقايەۆ ۇلتتىق قۇرىلتاي وتىرىسىندا رەسپۋبليكا كۇنىنە ۇلتتىق مەرەكە رەتىندە تويلاۋدى ۇسىندى.
«رەسپۋبليكا كۇنى ەلدىڭ مەملەكەت قۇرۋ جولىنداعى تاريحي قادامىنىڭ سيمۆولى بولۋى كەرەك. ارينە، تاۋەلسىزدىك كۇنىنىڭ باستاپقى ءمانى ساقتالادى. بۇل كۇن مەملەكەتتىك مەرەكە بولىپ قالا بەرەدى. ءبىراق، تاۋەلسىزدىك الۋعا زور ۇلەس قوسقان ۇلتتىق باتىرلارىمىزعا تاعزىم كۇنى رەتىندە اتالىپ ءوتۋى كەرەك»، - دەدى پرەزيدەنت.
