ساراپشى ادۆوكات ماماندىعىن «ديپلوممەن اۋىلعا» باعادارلاماسىنا ەنگىزۋدى ۇسىندى
«ءبىز قازاقستاندىق ادۆوكاتۋرانى دامىتۋ تۇجىرىمداماسىن (2022-2025-جىلدارعا ارنالعان) ازىرلەدىك. ەڭ الدىمەن، ادۆوكاتۋرانىڭ تولىققاندى كاسىبي تاۋەلسىزدىگى تۇرعىسىندا قالاي جانە قاي باعىتتا ارەكەت ىستەۋ كەرەك ەكەنىن انىقتاعىمىز كەلدى. قۇجاتتى تالقىلاۋ بىلتىرعى جەلتوقسان ايىندا باستالدى. ادۆوكاتتار كەڭ اۋقىمدا قاتىسىپ، بيىل ءساۋىر ايىندا رەسپۋبليكالىق ادۆوكاتتار القاسىنىڭ ءتورالقاسى تۇجىرىمدامانى بەكىتتى. تۇجىرىمداما 16 بولىمنەن تۇرادى. ونىڭ ىشىندە «مىقتى ادۆوكاتۋرا»، «ادۆوكاتۋرانىڭ تاۋەلسىزدىگى»، «ادۆوكات پەن پروكۋروردىڭ تەپە-تەڭدىگى»، «ادۆوكات مارتەبەسىن نىعايتۋ»، «ادۆوكاتتىڭ ءتيىستى ەڭبەكاقىسى»، «ادۆوكات قىزمەتىنىڭ ناقتى كەپىلدىكتەرى»، «ادۆوكاتتاردىڭ الەۋمەتتىك ماسەلەلەرى» سەكىلدى باعىتتاردى شەشۋ جولدارى قامتىلدى»، - دەدى ايدىن بيكەبايەۆ ماجىلىستە ادۆوكاتۋرا تاقىرىبىنا ارنالعان دوڭگەلەك ۇستەل وتىرىسىندا.
ونىڭ ايتۋىنشا، مىقتى ادۆوكاتۋرا باعىتىندا رەسپۋبليكالىق ادۆوكاتتار القاسىنىڭ ورگاندارىن قايتا جاساقتاۋ، ىنتالاندىرۋ جۇيەسىن ەنگىزۋ جانە ولاردىڭ جۇمىسىن دەموكراتيالاندىرۋ ەسكەرىلگەن.
«ءبىز جۇمىس ورگاندارىن قايتا قۇردىق، وسى ورايدا عىلىمي-كونسۋلتاتيۆتىك كەڭەسىمىز بار. سونىمەن قاتار، ادۆوكاتتاردىڭ كاسىبي قۇقىقتارىن قورعاۋ جونىندەگى كوميسسيامىز جاساقتالعان. قازىرگى كەزدە ولار جاقسى جۇمىس ىستەپ جاتىر. بيىل ولاردىڭ ەرەجەلەرىن قايتا بەكىتىپ، قاراجات بولدىك. جۇمىس ورگاندارىنىڭ شەشىمدەرى مۇشەلەردىڭ پىكىرلەرىن ەسكەرە وتىرىپ، القالى تارتىپتە قابىلدانادى»، - دەدى ا. بيكەبايەۆ.
ونىڭ سوزىنە قاراعاندا، ادۆوكاتۋرانىڭ تاۋەلسىزدىگىن قامتاماسىز ەتۋ ءۇشىن ءۇش نەگىزگى ماسەلەنى شەشۋ كەرەك.
«بىرىنشىدەن، ادۆوكاتتارعا قاتىستى تارتىپتىك ءىس جۇرگىزۋ ماسەلەلەرىن ادۆوكاتۋراعا تولىعىمەن بەرۋ. قازىرگى كەزدە ادۆوكات ءوز ماماندىعىنان ەكى جولمەن ماجبۇرلەپ شىعارىلۋى مۇمكىن. وسى ورايدا ادىلەت مينيسترلىگى تالاپ قويعان كەزدە جانە ادۆوكاتتاردىڭ تارتىپتىك كوميسسياسىنىڭ شەشىمى نەگىزىندە ىسكە اسىرىلادى. ءبىز تارتىپتىك كوميسسياسىنىڭ شەشىمى بويىنشا عانا قاراۋدى ۇسىنامىز. رەسپۋبليكالىق ادۆوكاتتار القاسى جانىندا 11 مۇشەدەن تۇراتىن تارتىپتىك كوميسسيا بار. ەكىنشىدەن، ماماندىققا كىرۋ ماسەلەسىن شەشۋدى دە ادۆوكاتتارعا بەرۋ كەرەك. اتتەستاتتاۋ جونىندەگى كوميسسيا مۇشەلەرىنىڭ باسىم بولىگى، ياعني ونىڭ ءتوراعاسىن قوسا العاندا مىندەتتى تۇردە ادۆوكات بولۋى ءتيىس»، - دەدى رەسپۋبليكالىق ادۆوكاتتار القاسىنىڭ ءتوراعاسى.
سونىمەن قاتار ول رەسپۋبليكالىق ادۆوكاتتار القاسىنىڭ ىشكى نورماتيۆتىك اكتىلەرىن وكىلەتتى ورگانمەن كەلىسۋدى الىپ تاستاۋ كەرەك ەكەنىن اتاپ ءوتتى.
«ادۆوكاتتىڭ تاۋەلسىزدىگى بويىنشا ءتيىستى ۇسىنىستاردى داياندادىق. ادۆوكاتتاردىڭ ەڭبەكاقى دەڭگەيىن ايقىنداۋ كەزىندە مەملەكەت كەپىلدىك بەرەتىن زاڭ كومەگى جۇيەسى بويىنشا قىلمىستىق پروتسەستى جۇرگىزەتىن ورگاندارعا تاۋەلدىلىگىن الىپ تاستاۋ قاجەت. قازىرگى ۋاقىتتا تەرگەۋشى مەن سۋديا ادۆوكاتتىڭ ەڭبەكاقى دەڭگەيىن انىقتايتىن قاۋلى شىعارادى. ادۆوكاتتاردىڭ قۇقىقتارى مەن كەپىلدىكتەرىن بۇزۋ جونىندەگى شاعىمداردى قاراۋدىڭ ارنايى ءتارتىبى بەلگىلەنۋى ءتيىس. مۇنىمەن قوسا، سالىق سالۋ سالاسىنداعى ادۆوكاتتاردى كەمسىتەتىن نورمالاردى جويۋ كەرەك. بۇدان بولەك، ادۆوكاتتىڭ جۇمىسىنا تومەن اقى تولەۋ ءتارتىبىن دە جويعان ءجون. بۇل پروبلەمالاردى شەشپەسەك، مەملەكەت ادۆوكاتتاردىڭ ماسەلەسىنە بەت بۇردى دەپ ايتۋ قيىن»، - دەدى ايدىن بيكەبايەۆ.
ونىڭ پايىمىنشا، ادۆوكات ماماندىعىن «ديپلوممەن اۋىلعا» جوباسىنا ەنگىزۋ كەرەك.
